Azərbaycan, Bakı, 8 oktyabr /Trend, müxbir N.İsmayılova/
Asiya İnkişaf Bankın (AİB) Direktorlar Şurası tərəfindən Azərbaycanda paylayıcı elektrik enerjisi sisteminin inkişafı üzrə çoxtranşlı proqramın maliyyələşməsinin (MFF) bəyənilməsi 2011-ci ilin iyununa təyin edilib. Bu barədə cümə günü bankın məlumatında deyilir.
Layihənin detalları 2010-cu il oktyabrın sonunda dəqiqləşdiriləcək. Layihənin həyata keçirilməsinə ayrılan ilkin kapital resursları 50 milyon dollar təşkil edir. MFF-in proqnozlaşdırılan dəyəri ilkin olaraq 300 milyon dollardan 500 milyon dollaradək qiymətləndirilir.
Bundan əvvəl bankın konsultantı sistemin yenidən qurulmasına olan ehtiyacın müəyyənləşməsi və zəruri investisiya həcminin dəqiqləşdirilməsi məqsədilə paylayıcı elektrik enerjisi sektorunun ümumi təhlilini aparıb. Nəzərdə tutulur ki, MFF ölkə regionlarında aşağıvoltlu şəbəkələrin modernləşdirilməsi, istehlakçılar üçün sayğacların quraşdırılması daxil olmaqla, distribüterlik sisteminə köməyə yönələcək.
Bankın konsultantları MFF-in məhz elementi olacaq elektrik enerjisinin distribusiyasının inkişafına sərmayə proqramına (Power Distribution Development Investment Program) cəlb ediliblər. Bunun üçün bank bir milyard dollar məbləğində texniki yardım göstərib.
Konsultantın vəzifəsinə "Azərenerji" ASC üçün strukturun yenidən qurulması və biznes planının hazırlanması da daxildir. Bankın investisiyalarının "Azərenerji"nin tabeçiliyində olan regional şəbəkələrin bərpasına cəlb edilməsi planlaşdırılır. İndi "Azərenerji"nin balansında Bakı elektrik şəbəkəsi istisna olmaqla, 45-dən çox paylayıcı şəbəkə var.
2005-2015-ci illərdə Azərbaycanın yanacaq-enerji kompleksinin inkişafı üzrə Dövlət Proqramının maddələrinin yerinə yetirilməsi ilə əlaqədar işlər çərçivəsində yeni istilik və su elektrik stansiyalarının (1500 MVt) tikintisinə, mövcud generasiya obyektlərinin modernləşdirilməsinə və nəqliyyat şəbəkəsinin gücünün artırılmasına 3,8 milyard dollar tələb olunur.
Azərbaycan hökuməti AİB ilə 1999-cu ildən əməkdaşlıq edir. Hazırda bank Azərbaycanın enerji sektorunda elektrikötürücü xətlərin bərpası (Power Transmission Enhancement Project) üzrə bir layihəni həyata keçirir. Burada artıq baş podratçının seçimi üzrə tender elan edilib. Layihə bir neçə il ərzində 60 ildən çox istifadə olunan elektrikötürücü xətləri yenidən qurmağa imkan verəcək. Asiya bankı 20 il müddətinə 160 milyon dollar məbləğində beş il güzəştli dövr olmaqla və illik LIBOR-0,08 faiz dərəcəsi ilə kredit verir.
Layihə çərçvəsində Mingəçevir su elektrik stansiyasından Abşeron yarımstansiyasına kimi ikikonturlu 220 kV-lıq elektrikötürücü xətlərin çəkilməsi planlaşdırılır. Bununla yanaşı, 220/110 kV-luq yarımstansiyanın 110 kV-luq elektrikötürücü xətlə birləşdirilməsi də nəzərdə tutulur.
