Azərbaycan, Bakı, 3 noyabr /Trend, müxbir N.İsmayılova/
Azərbaycan bankı "RoyalBank" "Compass Plus" proqram kompleksinin bazasında yaradılan şəxsi "RoyalCard" prosessinq mərkəzinə xarici səhmdarları cəlb etmək imkanını nəzərdən keçirir. Bu barədə çərşənbə günü bankın idarə heyətinin sədri Samir Əkbərov deyib.
"Danışıqlar artıq aparılır və biz 2011-ci ildə xarici səhmdarların cəlb ediləcəyinə ümid edirik", - Əkbərov qeyd edib.
Onun sözlərinə görə, bu gün prosessinq mərkəzinin gücü 1,5 milyon plastik kart təşkil edir və tələbatın artacağı təqdirdə, miqdarın artırılması gözlənilir.
Hazırda "RoyalCard" "RoyalBank"ın 100 faizlik mülkiyyətidir.
"RoyalBank" "RoyalCard" prosessinq sisteminin birbaşa beynəlxalq ödəniş sistemi VISA Int-ə (VISA) qoşulması üzrə sertifikatlaşmadan keçib. Bank "MasterCard Worldwide", JCB və CUP-a birbaşa qoşulma layihələrini yekunlaşdırmaq üzrədir.
Hazırda bank 35 700 plastik kart buraxıb. Onlardan 30 600-ü aktivdir.
"RoyalBank" Azərbaycanda fəaliyyət göstərən, paytaxt Bakıda və ölkənin rayonlarında 32 filiala malik kommersiya bankıdır. Bank 1993-cü il avqustun 2-də ÖZBANK-ın birgə kommersiya bankı kimi yaradılıb.
Hazırda Azərbaycanda dörd prosessinq mərkəzi fəaliyyət göstərir. Bunlar "Azericard", "MilliKart", "TexKart" və "KapitalBank" prosessinqidir. Bu il "MilliKart"ın səhmdarlarının tərkibinə AYİB daxil olub.
