Azərbaycan, Bakı, 8 noyabr /Trend, müxbir A.Axundov/
Beynəlxalq təkrar sığorta şirkətlərinin illik simpoziumunda əldə olunan razılaşmaların yekununa əsasən, Azərbaycanın sığorta şirkəti "Paşa Sığorta" QSC 2011-ci il üçün strateji tərəfdaşların təsdiq edilməsi haqqında qərar qəbul edib. Bu barədə bazar ertəsi "Paşa Sığorta" sığorta şirkətinin idarə heyətinin sədri Nofəl Rzayev deyib.
"Bizim Direktorlar Şurası gələn il üçün regionlar üzrə strateji sığorta tərəfdaşlarını təsdiq edib. Bu təkrar sığorta şirkətləri "ACE" (Fransa), "Munich Re" (Almaniya), brokerlər "Marsh" (ABŞ), "Türker" (Türkiyə), eləcə də Londonun Lloyds bazarının üzvü olan iki brokerdir", - Rzayev qeyd edib.
Onun sözlərinə görə, sığorta şirkətinin ciddi, sabit və etibarlı təkrar sığorta layihələri olmalıdır.
"Ciddi həcmə malik hər bir sığorta şirkəti xarici bazarlarda təkrar sığortanı yerləşdirir. Bunun üçün "reinsurance capacity" (təkrar sığortanın imkanları) alınır", - Rzayev bildirib.
Danışıqlar prosesi oktyabrın 24-29-da Almaniyanın Baden-Baden şəhərində keçirilən simpozium və forum çərçivəsində aparılıb.
"Paşa Sığorta" "Paşa Holdinq" qrupunun üzvüdür və sığortanın 30 növü üzrə korporativ və fərdi müştərilərə xidmət göstərir. 20 milyon manat nizamnamə kapitalı və 28 milyon manat ümumi aktivləri ilə "Paşa Sığorta" kapitallaşmanın həcminə görə ölkənin ilk üç sığortaçısı siyahısına daxil olmaqla, sığorta sektorunda biznesin rentabelliliyini qorumaqda ən yüksək göstəricilərə malikdir. Şirkətin nizamnamə kapitalı 20 milyon manatdır.
2007-ci ildən "Paşa Sığorta" Böyük Britaniyanın "Moody International" agentliyi tərəfindən sığorta məhsullarının ISO 9001:2000 keyfiyyət idarəetmə standartlarına və xidmətlərinə uyğunluq səviyyəsinə görə sertifikatla təltif olunub. 2009-cu ildən etibarən, "Paşa Sığorta" BMT-nin insan hüquqlarının, ətraf mühitin müdafiəsi və korrupsiyanın qarşısının alınması üzrə Qlobal Müqaviləsinin (UN Global Compact Initiative) iştirakçısıdır.
Noyabrın 8-nə olan rəsmi məzənnə 0,7999 AZN/USD təşkil edir.