Azərbaycan, Bakı, 10 dekabr /Trend, müxbir N.İsmayılova/
Azərbaycan Dövlət Gömrük Komitəsi cümə günü ictimaiyyətə öz saytının yenilənmiş versiyasını təqdim edib.
DGK sədri Aydın Əliyevin sözlərinə görə, saytda komitənin işi haqqında bütün lazımi informasiya verilib.
"Saytda DGK sədrinə birbaşa müraciət etmək üçün imkan da yaradılıb. Bu günə qədər daxil olan bütün müraciətlərə baxılıb və ya baxılma prosesindədir. Bu sayt gömrük işində effektivliyin artırılması işində əsas addımlardan biridir", - Əliyev qeyd edib.
DGK-nın Statistika və İnformasiya Texnologiyaları Baş İdarəsinin rəisi İqbal Babayevin sözlərinə görə, saytda gömrük qanunvericiliyi, hökumət və beynəlxalq qurumlarla qarşılıqlı əlaqələr, komitənin statistik məlumatları haqqında informasiya var.
Saytda "E-gömrük xidmətləri", xarici şirkətlərin ofisi, elektron ödəmə sistemi, statistik kodun verilməsi, mallar nomenklaturası, nəqliyyat vasitələri üzrə gömrük hesablayıcısı kimi bölmələr yaradılıb.