Azərbaycan, Bakı, 15 dekabr /Trend, müxbir A.Axundov/
Bu ilin sentyabrında Türkiyədə işsizliyin səviyyəsi ötən ilin sentyabrındakı 13,9 faizə qarşı 11,8 faiz təşkil edib. Bu barədə Türkiyənin Statistika İnstitutu (TürkStat) çərşənbə günü məlumat verib.
Ötən ilin analoji dövrü ilə müqayisədə işsizlərin sayı 462 min nəfər azalaraq 2,934 milyon nəfər təşkil edib. Sentyabrda şəhərlərdə işsizliyin səviyyəsi 13,9 faiz, kənd yerlərində isə 6,3 faiz səviyyəsində olub.
Sentyabrda iqtisadi fəal əhalinin payı 49,1 faiz təşkil edib ki, bu da ötən ilin sentyabrında qeydə alınan göstəricidən 0,1 faiz çoxdur. Kişilər arasında bu göstərici 71,1 faiz, qadınlar arasında isə 27,9 faiz olub.
İşləyən əhalinin sayı ötən ilin sentyabrına nisbətən 953 nəfər artaraq 22,973 milyon nəfər təşkil edib.
Onların 26,6 faizi kənd təsərrüfatı sahəsində, 19,5 faizi sənaye, 6,6 faizi tikinti, 47,7 faizi isə xidmətlər sahəsində fəaliyyət göstərir.