Azərbaycan, Bakı, 19 yanvar /Trend, müxbir Ü.İsmayılova/
Azərbaycan Maliyyə Nazirliyi nəzdində Dövlət Sığorta Nəzarəti Xidməti gələcəkdə sığorta şirkətlərinin onlayn yoxlanışının tətbiqini planlaşdırır. Bu barədə çərşənbə günü Dövlət Xidmətinin rəhbəri Namiq Xəlilov deyib.
"Hazırda belə praktika tətbiq edilmir, lakin gələcəkdə bu mümkündür", - Xəlilov qeyd edib.
Onun sözlərinə görə, yoxlamaların belə mexanizmi ölkələrin çoxunda təcrübədən keçirilir, lakin bunun üçün sığortaçıların fəaliyyəti tam avtomatlaşdırılmalıdır. Hazırda bəzi sığortaçılar bu və ya digər dərəcədə avtomatlaşdırılmış sistemə keçiblər, bəziləri isə bunu planlaşdırırlar.
"Ümumilikdə sığorta bazarının artım həcmini, xüsusilə də pərakəndə satışın artımını nəzərə alaraq, bütün proseslərin idarə edilməsində informasiya texnologiyaları olmadan ötüşmək mümkün deyil", - Xəlilov deyib.
Onun sözlərinə görə, Dövlət Xidməti informasiya texnologiyalarının tətbiqi çərçivəsində 2011-ci ildən etibarən sığortaçıların hesabatlarını yalnız elektron formada qəbul edəcək. Yeni sistem hesabatların hazırlanmasında hansısa çatışmazlıq olanda onları qəbul etməyəcək.
Xəlilovun sözlərinə görə, yeni sistem həm hər bir şirkət, həm də bazardakı tendensiyalar haqqında daha yeni analitik informasiyanın əldə edilməsi üçün əlavə alətdir.
Azərbaycanda 27 sığorta və 1 təkrar sığorta şirkəti fəaliyyət göstərir. 2010-cu ilin yekunları üzrə sığortaçıların ümumi sığorta haqları 155,59 milyon manat təşkil edib, hesabat dövründə 53,83 milyon manat məbləğində ödənişlər həyata keçirilib.