...

Azərbaycanda icbari sığorta xidmətlərinin tətbiqi ilə bağlı monitorinqlər başlayır

Biznes və iqtisadiyyat xəbərləri Materials 21 Yanvar 2011 17:06 (UTC +04:00)

Azərbaycan, Bakı, 21 yanvar /Trend, müxbir Ü.İsmayılova/

Azərbaycan Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi fevral ayından etibarən istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanın tətbiqi predmeti ilə bağlı monitorinqlərə başlayacaq. Bu barədə cümə günü Müfəttişliyin rəis müavini Məhərrəm Məhərov Xəzər-Avropa İşgüzar İnteqrasiya Klubunun (CEIBC) iclasında deyib.

"Monitorinqlər Bakının bütün istehsalat müəssisələrində aparılacaq", - Məhərov qeyd edib.

Onun sözlərinə görə, Azərbaycanda bu növ sığortanın tətbiqi texniki təhlükəsizlik qaydalarının tələblərinin müəyyən edildiyi sığorta müqaviləsinin tələb olunması səbəbindən istehsalatda bədbəxt hadisələrin sayını xeyli azaldacaq.

Məhərovun sözlərinə görə, 2010-cu ildə Azərbaycanda istehsalatda 69 nəfər (31 nəfəri tikinti sektorunda) həlak olub.

"Ölkədə istehsalatda bədbəxt hadisələrin sayının azalması müşahidə olunur ki, bu da həm tikintinin həcminin azalması, həm də Əmək Müfəttişliyinin keçirdiyi tədbirlərlə bağlıdır", - Məhərov bildirib.

2007-ci ildə Azərbaycanda 259 bədbəxt hadisəyə, 128 ölüm faktına, 202 müxtəlif növ xəsarət alma hallarına təsadüf edilib. 2008-ci ildə 255 bədbəxt hadisə, 79 ölüm faktı və 212 zədə alma, 2009-cu ildə isə 250 bədbəxt hadisə, 69 ölüm hadisəsi və 218 zədə alma faktı qeydə alınıb.

Ümumdünya Əmək Təşkilatının məlumatına görə, hər il dünyada istehsalatda baş verən bədbəxt hadisələr nəticəsində 2,3 milyon insan həlak olur, bu rəqəmdən üç dəfə çox şəxs isə müxtəlif növ zədələr alır.

2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib. Bu gün ölkədə həyat sığortası üzrə iki şirkət - "Atəşgah Həyat" və "Qala Həyat" fəaliyyət göstərir, yaxın vaxtlarda "Paşa Həyat " şirkətinin lisenziyalaşdırılmasının başa çatacağı gözlənilir.

Xəbər lenti

Xəbər lenti