Azərbaycan, Bakı, 5 aprel /Trend, müxbir T.Cəfərov/
Cari ilin əvvəlindən indiyə qədər (İranda il martın 21-də dəyişir) Astara sərhəd keçid məntəqəsindən 27620 ton məhsul (portfel ticarəti vasitəsilə) ölkədən Azərbaycana ixrac olunub. İxrac olunmuş məhsulun dəyəri 35,7 milyon dollardır. Bunu İranın Gilan əyalətinin gömrük nəzarəti idarəsinin rəhbəri Məhəmməd Behbud Ahəni deyib. Bu barədə Trend İranın MEHR xəbər agentliyinə istinadən məlumat verir.
Ahəninin sözlərinə görə, ixrac edilmiş məhsul ötən ilin analoji dövrü ilə müqayisədə dəyər baxımından 40 faiz, çəki baxımından isə 75 faiz artıb.
Onun sözlərinə görə, həmin müddət ərzində 450697 nəfər Gilan əyalətində yerləşən sərhəd keçid məntəqəsindən İrana gəlib və 444927 nəfər ölkədən gedib, bu göstərici ötən ilin analoji dövrü ilə müqayisədə müvafiq olaraq, 71 və 70 faiz artıb.
Ahəninin sözlərinə görə, Azərbaycana (portfel ticarəti olaraq) ixrac olunan məhsullar əsasən ərzaq məhsulları, təmizləyici vasitələr, paltar, konservləşdirilmiş məhsullar, plastik məmulatlar, meyvə və tərəvəz, müxtəlif növ içkilər, gül və bitkilərdir.
İran Azərbaycan vətəndaşları üçün viza rejimini birtərəfli qaydada ləğv edib. 2010-cu il fevralın 1-dən etibarən İrana gedən Azərbaycan vətəndaşlarından viza tələb olunmur.