Azərbaycan, Bakı, 6 aprel /Trend, müxbir İ.Xəlilova/
Çərşənbə günü Bakıda keçirilən Azərbaycan-Yunanıstan biznes forumu çərçivəsində Azərbaycanda İxracın və İnvestisiyaların Təşviqi Fondu (AZPROMO) və Yunanıstan Xarici Ticarət Təşkilatı (HEPO) arasında qarşılıqlı əməkdaşlıq haqqında memorandum imzalanıb.
Azərbaycan tərəfdən memorandumu AZPROMO-nun prezidenti Adil Məmmədov, Yunanıstan tərəfdən HEPO rəhbəri Aleksandros Çolevas imzalayıb.
Biznes-forumda Azərbaycan Prezidenti İlham Əliyev və Yunanıstan Prezidenti Karolos Papulyas çıxış edib.
Tədbirdə 300 nəfərə yaxın şəxs iştirak edib. Onların sırasında kənd təsərrüfatı və qida sənayesi, səhiyyə və əczaçılıq, energetika, İKT, maliyyə, tikinti və digər sahələrdə fəaliyyət göstərən 200-ə yaxın sahibkar da olub.
2010-cu ilin yekunları üzrə Azərbaycan və Yunanıstan arasında xarici mal dövriyyəsi 267,09 milyon dollar təşkil edib. Bununla yanaşı, ixrac əməliyyatlarının payına 255,01 milyon dollar, idxalın isə 12,08 milyon dollar düşür.
AZPROMO Azərbaycan hökuməti tərəfindən 2003-cü ildə təsis edilib. Fondun idarəçiliyinin ali orqanı özəl sektor və beynəlxalq birliklərin nümayəndələrindən ibarət olan Himayəçilər Şurasıdır. İlkin olaraq fond ölkəyə xarici investisiyaların cəlb edilməsinin dəstəklənməsi üçün yaradılmışdı, lakin 2005-ci ildə onun funksiyalarına yerli məhsul və xidmətlərin təşviqi də əlavə olunub.
HEPO rəsmən Yunanıstanın ixrac siyasətinin həyata keçirilməsinə cavabdehdir. Təşkilatın əsas fəaliyyət istiqamətləri - yunan müəssisələrinin xarici bazarlarda biznesinin genişləndirilməsi üçün fəaliyyətin koordinasiyası, Yunanıstanın milli ixrac siyasətinə uyğun olaraq təcrübənin yaxşılaşdırılmasına yardım göstərilməsi, ixrac siyasəti məsələlərində "nou-hau"nun hazırlanması və tətbiqi, xarici bazarlarda tərəfdaşlığın qiymətləndirilməsi və xaricdə yunan müəssisələri üçün müvafiq imkanların yaradılması, kiçik və orta sahibkarlığın xarici bazarlara çıxması üçün yardım göstərilməsidir.