Azərbaycan, Bakı, 28 aprel /Trend, müxbir İ.Xəlilova/
İslam İnkişaf Bankının (İİB) İcraçı Direktorlar Şurası mayın əvvəllərində Naxçıvan Muxtar Respubliksında (NMR) sel və daşqınların qarşısının alınması üzrə layihənin həyata keçirilməsinə 65 milyon dollar məbləğində maliyyənin ayrılmasını planlaşdırır. Bu barədə cümə axşamı Trend-ə ölkə hökumətindən məlumat veriblər.
Dörd il üçün nəzərdə tutulan layihənin ümumi dəyəri təxminən 80 milyon dollar təşkil edir.
İİB krediti iki hissədən ibarətdir: 9,5 milyon dollar güzəştli şərtlərlə veriləcək. 4 illik güzəşt dövrü və 2,6 faiz dərəcəsi ilə 19 illiyə, 55 milyon dollar - 4 illik güzəşt dövrü və "swop rate" dərəcəsi üzrə 14 illiyə qeyri-kommersiya şərtləri ilə.
"Azərbaycanda iqtisadi inkişafın yüksək templərinə baxmayaraq, İslam bankı NMR-dəki vəziyyəti nəzərə alaraq [NMR blokada vəziyyətindədir] ölkədə layihələrin güzəştli maliyyələşdirilməsindən imtina edib və kreditlərin bir hissəsinin güzəştli şərtlərlə ayrılmasına razılaşıb", - ölkə hökumətindən deyiblər.
Layihə çərçivəsində Araz çayı kənarında sahilbərkitmə qurğularının, əlavə kanalların tikintisi və digər tədbirlər nəzərdə tutulub.
Ötən il yayın əvvəllərində Kür, Araz və digər çayların daşması nəticəsində Azərbaycanın 40 rayonunun ərazisində güclü daşqınlar baş vermişdi. Təbii fəlakət nəticəsində 20 minə yaxın ev su altında qalmış, 300-dən artıq ev tamamilə dağılmış, iki mini qəzalı vəziyyətə düşmüş, 50 min hektardan artıq əkin sahəsi və otlaq su altında qalmışdı.
Azərbaycanın Ekologiya və Təbii Sərvətlər Nazirliyinin Milli Hidrometeorologiya Departamenti çay axınlarının formalaşdıqları yüksək dağlıq ərazilərdə qarın qalınlığının ölçülməsi ilə əlaqədar tədqiqatlar aparıb. Bu işlər Böyük və Kiçik Qafqaz dağlarında yeddi, NMR-də beş marşrut üzrə həyata keçirilib. Ekspedisiya işləri nəticəsində aydın olub ki, dağ çaylarının hövzələrində qar şəklində su ehtiyatları çoxillik normanı, habelə 2010-cu ildə qeydə alınan normanı ötür.
Belə ki, NMR-dəki çay hövzələrində norma 67,1 millimetrə bərabərdir. Hazırda isə 103 millimetr təşkil edir.
