Azərbaycan, Bakı, 16 may /Trend, müxbir A.Axundov/
Yanvar-aprel aylarında Azərbaycanda tikinti sənayesi sahəsində 60,1 milyon manatlıq məhsul istehsal edilib. Bu barədə bazar ertəsi Dövlət Statistika Komitəsindən məlumat verilib.
Bu müddət ərzində istehsalat müəssisələrində 422,1 min ton sement istehsal edilib ki, bu da 2010-cu ilin analoji dövr göstəricisindən 4 faiz çoxdur. 32 min ton tikinti gipsi (2,8 dəfə çox), eləcə də 239,5 min ton hazır beton qatışığı (1,4 faiz çox) istehsal edilib.
Dörd ay ərzində 59,7 min ton asfalt (azalma 68 faiz), 10,9 min kubmetr tikinti-quraşdırma konstruksiyaları (azalma 33,1 faiz), 65,1 min kubmetr tikinti kərpici istehsal edilib.
2011-ci il mayın 1-nə olan vəziyyətə görə, müəssisələrin anbarlarında 10,2 milyon manatlıq hazır məhsul ehtiyatı yaradılıb ki, bu da ölkə sənayesində hazır məhsulun ümumi ehtiyat həcminin 4,5 faizini təşkil edir.
Mayın 16-na olan rəsmi məzənnə 0,7907 AZN/USD təşkil edir.
