...

Azərbaycanın sığorta bazarı 2011-ci ildə 20-30 faiz arta bilər - Dövlət Sığorta Nəzarəti Xidməti

Biznes və iqtisadiyyat xəbərləri Materials 27 May 2011 16:52 (UTC +04:00)

Azərbaycan, Bakı, 27 may /Trend, müxbir A.Axundov/

2011-ci ildəki fəaliyyətin yekunları üzrə Azərbaycanın sığorta bazarı 20-30 faiz arta bilər. Bu barədə cümə günü jurnalistlərə Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov deyib.

Dövlət Sığorta Nəzarəti Xidmətinin məlumatına görə, 2010-cu ildə sığorta haqlarının ümumi həcmi 155,59 milyon manat təşkil edib. 2011-ci ilin yanvar-aprelində ölkədə fəaliyyət göstərən bütün şirkətlərin sığorta haqlarının ümumi həcmi 66,342 milyon manat (23,47 faiz artım) təşkil edib. Hesabat dövrü ərzində 17,673 milyon manat (21,71 faiz artım) məbləğində ödənişlər həyata keçirilib.

"İşləməyə başlayacaq sığortanın icbari növləri nəzərə alaraq, bazarın 20-30 faiz artacağını proqnozlaşdırırıq", - Xəlilov bildirib.

Milli Məclisdə "Sığortanın icbari növləri haqqında" qanun layihəsi üçüncü oxunuşda müzakirə edilir.

Yeni qanun layihəsi icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.

Qanun layihəsinə əsasən, mənzilin qiymətindən asılı olmayaraq, Bakı üçün 25 min manat səviyyəsində məbləğin tətbiq edilməsi barədə qərar qəbul edilib, azadolma məbləği isə 250 manat səviyyəsində müəyyənləşdirilib. Sumqayıt, Gəncə və Naxçıvan şəhərləri üçün 200 manat azadolma məbləği ilə sığorta məbləği 20 min manat, qalan regionlar üçün 15 min manat (150 manat) səviyyəsində təşkil edir.

Sığortanın bu növü üzrə 0,2 faizlik sığorta tarifi ilə paytaxt sakinləri üçün sığorta haqqı 50 manat təşkil edəcək, sığorta ödənişinin böyük məbləğinə ümid edənlər isə əmlakın könüllü sığorta polisini almaq imkanını əldə edirlər, bu isə sığortanın bu istiqamətinin də inkişafına imkan verəcək.

Daşınmaz əmlakın icbari sığortası fiziki şəxslərə məxsus bütün növ tikililərə, yaşayış evlərinə, hüquqi şəxslərin ofislərinə, dövlət əmlakına aid olacaq. Bununla yanaşı, sığorta faktları bu əmlaka yanğın, partlayış, tufan, elektrik şəbəkəsində qısaqapanma, kanalizasiya və ya su kəməri sistemində qəzalar, təbii kataklizmlər və s. nəticəsində dəyən ziyanlar hesab ediləcək.

Daşınmaz əmlakın istismarı ilə bağlı vətəndaş məsuliyyətinin icbari sığortası üçüncü şəxslərin bu əmlakdan istifadə zamanı dəyən ziyandan sığorta müdafiəsini nəzərdə tutur. Sığortanın bu növü sahibkarlıq fəaliyyəti ilə məşğul olan hüquqi və fiziki şəxslərə aid olacaq. Sığortanın bu növü üzrə sağlamlığa dəyən ziyan zamanı ödənişin məbləği 50 min manat (bir nəfər üçün 5 min manat), əmlak üçün 50 min manat təşkil edəcək.

Sərnişinlərin icbari sığortası növündən asılı olmayaraq nəqliyyatdan istifadə edən şəxslərə şamil ediləcək. Bu halda sığorta ödənişinin məbləği bir nəfər üçün 5 min manat təşkil edəcək. İndiyədək sığortanın bu növü 2003-cü ildə qəbul edilən qanunla tənzimlənib. Lakin hazırda onun forması qəbuledilməzdir və təzminat alarkən problemlər yaradır.

Qanun layihəsi avtonəqliyyat vasitəsindən asılı olaraq sığorta tarifinin müəyyənləşdirilməsi zamanı şaxələndirilmiş yanaşmanı nəzərdə tutur. Əmlak üzrə avtonəqliyyat vasitələri sahiblərinin məsuliyyətinin ödəniş məbləği 5 min manat (hazırda 1 min manat), sağlamlıq üzrə 50 min manat (hazırda 5 min manat) təşkil edəcək. Fəaliyyətin bu növü 1996-cı ilin qanunu ilə tənzimlənir.

Azərbaycanda 28 sığorta şirkəti və 1 təkrar sığorta şirkəti fəaliyyət göstərir.

Xəbər lenti

Xəbər lenti