Azərbaycan, Bakı, 10 avqust /Trend, müxbir N.İsmayılova/
Azərbaycanın bank sektorunun adekvatlıq göstəricisi məqbul səviyyədə olaraq ölkənin Mərkəzi Bankının müəyyənləşdirdiyi normativləri ötür. Bu barədə AMB-nin maliyyə sabitliyi üzrə hesabatında deyilir.
İlin birinci yarısında bankların məcmu kapitalı 4,5 faiz və ya 85,6 milyon manat artaraq 1,98 milyard manat təşkil edib. İl ərzində artım 10,2 faiz təşkil edib.
Birinci dərəcəli kapital hesabat dövrü ərzində 10,1 faiz, il ərzində 11,5 faiz artıb.
Yanvar-iyunda ölkə banklarında səhmdarların vəsaitləri 1,45 milyard manata çataraq 6,6 faiz artıb. Ötən illə müqayisədə nizamnamə kapitalı 12 faiz və ya 157,5 milyon manat artıb. Nizamnamə kapitalının məcmu kapitalında xüsusi çəkisi ilin əvvəli ilə müqayisədə 71,7 faizdən 73,1 faizədək artıb.
Hesabat dövründə AMB "leverec" əmsalının tətbiqinə başlayıb. Onun minimal norması 8 faiz səviyyəsində müəyyənləşdirilmişdi. İkinci rübün əvvəlinə bu göstərici 11,5 faiz, iyulun 1-nə 11,1 faiz təşkil edib.
Bank sektorunun məcmu kapitalının adekvatlığı 16,8 faiz təşkil edib. Bu göstərici minimal normaya qarşı 12 faiz, birinci səviyyəli kapitala qarşı 13,7 faiz, normaya qarşı 6 faiz olub.
Avqustun 10-na olan rəsmi məzənnə 0,7865 AZN/USD təşkil edir.
