Azərbaycan, Bakı, 6 oktyabr /Trend, müxbir N.İsmayılova/
Azərbaycan daxili bazarda idxaldan asılı məhsulların istehsalı yolu ilə iqtisadiyyatın qeyri-neft sektorunun inkişafını hədəfləyib. Bu barədə Azərbaycan Nazirlər Kabinetinin İqtisadiyyat və maliyyə-kredit siyasəti şöbəsinin müdiri Şahin Sadıqov cümə axşamı Bakıda keçirilən "Sənayeçilərin, sahibkarların ictimai birliklərinin və hakimiyyət orqanlarının sistemli qarşılıqlı fəaliyyəti uğurlu sosial-iqtisadi inkişafın ayrılmaz şərti kimi" beynəlxalq konfransında deyib.
"Dünya iqtisadiyyatında bədbin gözləntilər mövcuddur, lakin Azərbaycan iqtisadiyyatı ilə bağlı gözləntilər müsbətdir. İqtisadiyyatın inkişafı qeyri-neft sektorunun inkişafı və əsasən daxili bazarda idxaldan asılı məhsulların istehsalı və onun xarici bazarlara ixracı yolu ilə təmin olunacaq", - Sadıqov deyib.
Onun sözlərinə görə, bu gün ölkədə qeyri-neft sektoru uğurla inkişaf edir ki, bu da iqtisadiyyatın şaxələndirilməsinə yardım göstərir. On il ərzində ölkə iqtisadiyyatında investisiyaların ümumi həcmi 90 milyard dolları ötüb, 2006-cı ildən daxili investisiyaların xüsusi çəkisi xarici investisiyaların payını kəskin şəkildə üstələyib.
"Son 10 il ərzində qeyri-neft ixracında orta illik artım 22 faiz təşkil edir ki, bu da son nəticədə ölkənin qeyri-neft sektorunun artımına gərib çıxarır", - Sadıqov deyib.
Şöbə müdiri bildirib ki, on il ərzində infrastrukturda dövlət investisiyalarının həcmi 160 dəfə artıb.
Onun sözlərinə görə, Azərbaycanda sahibkarlıq fəaliyyətini tənzimləyən normativ-hüquqi aktların sayı 150-ni ötür, eləcə də iqtisadi sahədə on məcəllə qəbul edilib.
