Azərbaycan, Bakı, 26 oktyabr /Trend, müxbir N.İsmayılova/
Ümumdünya Ticarət Təşkilatının (ÜTT) Katibliyi Azərbaycanın yeni təklifi üzrə üzv ölkələr üçün toplu hesabat hazırlayıb. Bu barədə Trend-ə çərşənbə günü danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib.
Azərbaycan hökuməti əvvəllər ÜTT-yə üzv olan dövlətlərin suallarına cavablarını Katibliyə təqdim edib. Bunun əsasında Katiblik "Factual Summary" adlı toplu hesabat hazırlayıb. Sənəd Azərbaycanın ÜTT-yə üzv olması üzrə gördüyü işlər barədə hesabatı əhatə edir.
"Biz bu hesabatla tanış olduq, öz düzəlişlərimizi etdik və onu Azərbaycan üzrə işçi qrupunun üzvləri arasında növbəti dəfə baxılması məqsədilə ÜTT Katibliyinə qaytardıq", - Məmmədquliyev deyib.
Onun sözlərinə görə, yaxın aylar ərzində Katiblik və ölkə üzrə işçi qrupunun üzv ölkələri çoxtərəfli danışıqların doqquzuncu raundunun keçirilmə tarixini müəyyənləşdirəcəklər.
"Danışıqların cari ilin noyabr ayının sonunda və ya dekabrın əvvəlində keçiriləcəyi planlaşdırılır", - nazir müavini bildirib.
Sonuncu görüş (çoxtərəfli danışıqların səkkizinci raundu) 2010-cu il oktyabrın 18-də Cenevrə şəhərində keçirilib. Həmin il oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə mal və xidmət məsələləri üzrə ikitərəfli görüşlər keçirilib.
