Azərbaycan, Bakı, 21 noyabr /Trend, müxbir T.Cəfərov/
İranın sabiq əmək naziri Hüseyn Kəmali deyib ki, işçilərin aldığı əməkhaqqı onların yaşayışına və güzəranlarını keçirməyə çatmır.
Kəmali İranın İLNA agentliyi ilə müsahibəsində bildirib ki, işçilərin (fəhlələrin) çoxu yoxsuluq həddindən aşağı səviyyədə yaşayır və ölkənin sənaye sektoru getdikcə iflasa uğramaqdadır.
"Sənaye sektorunda rəqabət yoxdur. Bu sektorda yenidənqurma işləri aparılmasa və yeni texnologiyalarla təchiz olunmasa, sektorun bağlanması və iflasa uğraması qaçılmazdır", - o deyib.
Kəmali ölkədə narkomanların, boşanma hallarının və məhbusların sayının artmasının və nikah sayının azalmasının işsizlik və yoxsulluqla bağlı olduğunu deyib. "Gənclər üçün iş imkanları olmadığından, onların böyük əksəriyyəti ailələrinin az maaşı ilə dolanmağa məcbur qalıblar", - Kəmali əlavə edib.