Azərbaycan, Bakı, 5 dekabr /Trend, müxbir N.İsmayılova/
Azərbaycan bankı "Gəncə Bank" ölkədə ipoteka kreditləşməsi bərpa olunandan (2009-cu ilin iyunundan) ölkənin Mərkəzi Bankı yanında fəaliyyət göstərən Azərbaycan İpoteka Fondunun (AİF) xətti ilə 154 kredit verib. Bu barədə Trend-ə bazar ertəsi bankdan məlumat verilib.
"Bu gün bank standart şərtlərlə ümumi məbləği üç milyon manatdan çox 139 və sosial ipoteka çərçivəsində 15 ipoteka krediti verib", - bankdan deyiblər.
Mənbənin sözlərinə görə, bank daxil olan müraciətlərin təxminən 90 faizini maliyyələşdirib.
"Əhali tərəfdən ipoteka kreditlərinə maraq stabil olaraq qalır. Gəncədə ipotekanın alınması üzrə müraciətlərin böyük əksəriyyəti məhz bizim bankın payına düşür. Çünki biz ərizələri birbaşa təsdiqləyirik və onları təsdiqlənmək üçün Bakıya göndərməyimizə ehtiyac yoxdur", - bankdan deyiblər.
"Gəncə Bank" baş ofisi Gəncədə yerləşən yeganə bankdır. Burada Azərbaycanın başqa banklarının filialları da fəaliyyət göstərir.
AİF xətti ilə maliyyələşdirilməyə başlanandan - 2006-cı ildən 2011-ci il dekabrın 1-dək 335,78 milyon manat məbləğində ipoteka krediti verilib.
Hazırda AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Kreditlər milli valyutada - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 80 faizini, kreditə görə aylıq ödəniş borcalanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədi və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin maksimum üç il xidmət stajı olan hərbçilərə şamil edilir. Güzəştli ipoteka kreditinə haqqı olan hər ailə ondan ancaq bir dəfə istifadə edə bilər.
Hazırda İpoteka Fondunun 26 müvəkkil bankı var. İpoteka bazarının iştirakçıları, həmçinin, 19 sığorta şirkəti və 13 qiymətləndirmə təşkilatıdır.
"Gəncə Bank" 1994-cü ildən fəaliyyət göstərir. Baş ofis Gəncə şəhərində yerləşir. Bankın nizamnamə kapitalı 15 milyon manat təşkil edir. Bu gün Gəncə, Şəmkir, Bərdədə bankın 4 filialı fəaliyyət göstərir. Bankın səhmdarı fiziki şəxsdir. Səhmlərin 54 faizi Pərvanə Novruzovaya məxsusdur.
Dekabrın 5-nə olan rəsmi məzənnə 0,7865 AZN/USD təşkil edir.