Azərbaycan, Bakı, 27 dekabr /Trend, müxbir N.İsmayılova/
"Unibank" ölkənin regionlarında ipoteka kreditlərinin verilməsi prosesini yaxşılaşdırır. Bu barədə çərşənbə axşamı Trend-ə bankdan məlumat veriblər.
"Son vaxtlar bank ipoteka kreditləşməsinin həcmini xeyli artırmağa nail olub. Fəaliyyətin daha da genişləndirilməsi məqsədilə bank prosesə regional filialların birbaşa sifariş qəbulunu qoşmağa başlayıb", - bankdan deyiblər.
Məlumata əsasən, bu gün belə təcrübə artıq Gəncədə tətbiq edilir və hazırda onun bankın Şəki və Lənkərandakı filiallarında tətbiq edilməsi prosesi aparılır. Bankın regional filialları Sumqayıt, Quba, Şəki, Gəncə, Mingəçevir, Lənkəran və Şəmkirdə fəaliyyət göstərir.
"Bank hər il təxminən 250-300 kredit ayırmağı planlaşdırır. Əgər əvvəl Azərbaycan İpoteka Fondunun xətti ilə kreditləşmədə bank üçün limit 2-4 milyon manat səviyyəsində müəyyənləşdirilmişdisə, indi limit 8 milyon manata qədər artırılıb. Bu da fondun ən yüksək limitlərindəndir", - bankdan bildiriblər.
İpoteka Fondu tərəfindən yenidən maliyyələşdirilən "Unibank"ın ipoteka kreditlərinin portfeli sentyabrın 1-nə 17,5 milyon manat təşkil edib. Ümumilikdə, 2006-cı ildən 2011-ci il iyunun 30-dək bank 447 ipoteka krediti ayırıb, onlar arasında sosial ipoteka üzrə dəyəri 1,226 milyon manat olan 40 kredit var.
"Unibank" 2002-ci il oktyabrın 15-də iki özəl kommersiya bankı - "Mbank" və "Promtekhbank"ın birləşməsi nəticəsində yaranıb. "Unibank" universal maliyyə-kredit müəssisəsidir, pərakəndə və korporativ xidmətlər təklif edir. Avropa Yenidənqurma və İnkişaf Bankı (15,1515 faiz) və DEG Almaniya İnvestisiya Korporasiyası (8,3333 faiz) kimi maliyyə institutları bankın səhmdarlarıdır.
Dekabrın 27-nə olan rəsmi məzənnə 0,7863 AZN/USD təşkil edir.
