Azərbaycan, Bakı, 6 fevral /Trend, müxbir N.İsmayılova/
Azərbaycan bankı "Kapital Bank" hazırda xarici şirkətlərə qısamüddətli şərtlərlə sərbəst kredit resurslarını təqdim edir. Bu barədə bazar ertəsi Trend-ə bankın mətbuat xidmətindən məlumat veriblər.
"Kapital Bank" kifayət qədər maliyyə resurslarına malik olduğundan, bu gün beynəlxalq maliyyə institutlarından kredit xəttinin açılmasına zərurət yoxdur", - bankdan deyiblər.
Fevralda "Fitch Ratings" beynəlxalq reytinq agentliyi "Kapital Bank"ın xarici valyutada defolt emitentinin uzunmüddətli reytinqini "Sabit" proqnozla "B+" səviyyəsində təsdiq edib.
2011-ci ilin sonuna olan məlumata görə, "Kapital Bank" aktivlərin həcmi və pərakəndə depozitlər üzrə Azərbaycanın ən iri ikinci bankıdır. Hazırda "Kapital Bank"ın əsas səhmdarı "Pasha Holding"dir. Holdinqə səhmlərin 97,75 faizi məxsusdur.
2011-ci ilin yekunları üzrə bankın aktivləri 1320,9 milyon manat təşkil edib. Ötən il ərzində bankın nizamnamə kapitalı 40 milyon manata qədər artırılıb. 2012-ci ilin yanvarın 1-nə olan vəziyyətə görə, bankın kredit portfeli 963,6 milyon manat, depozit portfeli isə 464,75 milyon manat təşkil edib.