Azərbaycan, Bakı, 28 fevral /Trend, müxbir Y.Kosolapova/
Azərbaycan və Qazaxıstanın Aktobe vilayətinin şirkətləri neft maşınqayırması və tikinti sahəsində müştərək müəssisələrin yaradılması imkanlarını müzakirə edir. Bu barədə çərşənbə axşamı Trend-ə telefonla Aktobe vilayəti akımatının (hakimiyyətin regional orqanı) Sahibkarlıq və sənaye idarəsinin sədr müavini Tles Utesinov bildirib.
"Bakı neft maşınqayırma zavodu Aktobe neft avadanlıqları zavodu ilə əməkdaşlıqda maraqlı olduğunu bildirib. Müxtəlif neft avadanlıqlarının tədarükü və Aktobedə müştərək müəssisənin təşkili müzakirə edilib, - Utesinov deyib. - Bundan başqa, Azərbaycanın "Mətanət A" şirkəti Aktobe vilayətində quru tikinti qarışıqlarının müştərək istehsalının təşkilində maraqlı olduğunu ifadə edib".
Onun sözlərinə görə, bununla yanaşı, Qazaxıstanın "Kazstroysteklo" şirkətinin törəmə strukturu olan "Kazstroyservis" şirkəti Azərbaycan tərəfi ilə şüşə zavodunun tikintisinə və Aktobedə kvarslı qumun zənginləşdirilməsi üzrə kombinata birgə investisiya qoyuluşu imkanını müzakirə edib. Lakin bu təklifi hələlik Azərbaycan tərəfi nəzərdən keçirir.
Utesinov bildirib ki, ötən həftə Bakıda keçirilən Azərbaycan-Qazaxıstan biznes forumu nəticəsində Aktobe qeyri-metal boru zavodu Azərbaycanın "Azərikimya" İstehsalat Birliyindən efir qatranları almaq, Qazaxıstanın neft və qaz quyularının kəşfiyyatı və istismar qazıntısı ilə məşğul olan "Akpan" şirkəti Azərbaycan tərəfinə neft-qaz sahəsində texniki xidmətlər göstərmək barədə razılığa gəlib.
Digər tərəfdən, Aktobe beynəlxalq aeroportu Azərbaycanın "Silk Air" şirkəti ilə yük və sərnişin daşımaları sahəsində əməkdaşlıq, Qazaxıstanın "Aktyubrentqen" şirkəti isə Azərbaycana rentgen avadanlıqlarının tədarükü haqqında razılıq əldə edib.
Tərəflər arasında bəzi razılıqlar kənd təsərrüfatı sahəsində də əldə edilib. Xüsusən, Qazaxıstan şirkətləri "As An", "KazFrukt" və "Kokonis" Azərbaycandan meyvə və tərəvəz məhsullarının tədarükü haqqında razılığa gəlib.
