Azərbaycan, Bakı, 15 mart /Trend, müxbir A.Axundov/
Azərbaycanda həyat sığortası ilə məşğul olmaq hüququna malik olan "Paşa Həyat", "Atəşgah Həyat" və "Qala Həyat" 2012-ci ilin yanvar-fevral aylarında həyat sığortasının bütün növləri üzrə 7,231 milyon manat toplayıb ki, bu da ötən ilin yanvar-fevral aylarının göstəricisini 2,8 dəfə üstələyir.
Trend-in məlumatına görə, bu barədə cümə axşamı Azərbaycan Maliyyə Nazirliyinin 2012-ci ilin yanvar-fevral aylarında sığorta şirkətlərinin fəaliyyəti haqqında dərc edilən hesabatında deyilir.
Bununla yanaşı, şirkətlərin yığımlarının ümumi həcmində həyat sığortası üzrə mükafatların payı il ərzində artaraq 8,05 faizdən 12,27 faizə çatıb.
Bu növlər üzrə ödənişlər də artıb: 2012-ci ilin yanvar-fevral aylarında 103 552,19 manat dəyərində dəymiş ziyan ödənilib ki, bu da ötən ilin yanvar-fevral aylarından 7,14 dəfə çoxdur.
2012-ci ilin ilk iki ayı ərzində şirkətlər istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə 3,185 milyon manat toplayıblar. Bu, ötən ilin analoji göstəricisini 1,62 dəfə üstələyir.
Həyatın könüllü sığortası üzrə yığımlar il ərzində 6,47 dəfə artaraq 4,046 milyon manata çatıb. Həyat sığortası sahəsində yığımların böyük hissəsi (3,824 milyon manat) ömrün qalan hissəsinin sığortasının payına düşüb. Qalan hissə ölum halının sığortalanması (0,22 milyon manat) hesabına təmin edilib.
Yanvar-fevral aylarında həyatın könüllü sığortası üzrə ödənişlər 53 173,63 manat məbləğində həyata keçirilib.
2012-ci ilin yanvar-fevral aylarında ölkədə fəaliyyət göstərən bütün şirkətlərin mükafatlarının ümumi həcmi 58,916 milyon manat təşkil edib (il ərzində 83,77 faiz artım), hesabat dövründə ödənişlər isə 9,55 milyon manat olub (artım təxminən 11,5 faiz).