...

"Azərsu" ASC-yə işə qəbul davam edir

Biznes və iqtisadiyyat xəbərləri Materials 20 Aprel 2012 16:24 (UTC +04:00)
"Azərsu" ASC işə qəbul prosesində subyektiv faktorların aradan qaldırılması və insan resurslarının idarə edilməsi mexanizminin təkmilləşdirilməsi istiqamətində tədbirləri davam etdirir.
"Azərsu" ASC-yə işə qəbul davam edir

Azərbaycan, Bakı, 20 aprel /Trend/

"Azərsu" ASC işə qəbul prosesində subyektiv faktorların aradan qaldırılması və insan resurslarının idarə edilməsi mexanizminin təkmilləşdirilməsi istiqamətində tədbirləri davam etdirir.

ASC-nin mətbuat xidmətindən cümə günü Trend-ə verilən məlumata görə, kadrların seçilməsi, onların işə qəbulu, səmərəli yerləşdirilməsi və yerdəyişməsi, karyera yüksəlişinin planlaşdırılması, peşəkarlıq səviyyəsinin artırılması, eləcə də xidməti fəaliyyətin qiymətləndirilməsi məqsədilə 2012-ci ildən "Azərsu"da İnsan resursları şöbəsi formalaşdırılıb.

Hazırda "Azərsu" ASC-yə işə qəbul bu şöbə tərəfindən müraciət edən vətəndaşların bilik və bacarığı yoxlanılmaq şərti ilə həyata keçirilir və bu zaman həlledici rolu iddiaçıların peşə hazırlığı oynayır. İşçilərin işə qəbulu müsabiqə yolu ilə həyata keçirilir. Müsabiqənin birinci mərhələsi test imtahanı (peşə imtahanı), ikinci mərhələsi isə "Azərsu" mütəxəssislərindən ibarət qrup tərəfindən keçirilən fərdi müsahibədən ibarətdir.

2012-ci ilin birinci rübündə 4100-dən artıq namizədin elektron müraciəti qəbul olunaraq ilkin təhlil mərhələsindən keçirilib. Müraciət edənlərdən 620 nəfər test mərhələsinə dəvət olunub və onların 57 nəfəri işə qəbul edilib.

Qeyd edək ki, "Azərsu" ASC-də ixtisas və peşəsinə uyğun vakansiyalar üzrə müsabiqədə iştirak etmək istəyənlər www.azersu.az veb-səhifəsinin "İnsan Resursları" bölməsinə daxil olub şəxsi məlumatlarını orada göstərilən elektron ünvana göndərməlidir.

Xəbər lenti

Xəbər lenti