Azərbaycan, Bakı, 23 aprel /Trend, müxbir A.Axundov/
Azərbaycan Mərkəzi Bankının (AMB) 2012 və 2013-cü illərdə inflyasiyanın 7-7,5 faizədək azaldılmasına dair niyyətinə baxmayaraq, 2012-ci ildə müxtəlif amillər inflyasiyanın 9 faizədək atrmasına, 2013-cü ildə isə 8,5 faizədək azalmasına gətirib çıxara bilər. Trend-in məlumatına görə, bu barədə Asiya İnkişaf Bankının (AİB) "Asian Development Outlook 2011" hesabatında deyilir.
2011-ci ildə istehlak qiymətlərinin indeksi 7,9 faiz, 2010-ci ildə 5,7 faiz artıb, bu ilin birinci rübündə isə inflyasiya 3,1 faiz təşkil edib.
"Neft gəlirləri ilə təmin edilən güclü daxili tələbat, dövlət sektorunun (əməkhaqqıların planlaşdırılmış artımı daxil olmaqla) artan istehlakı, həmçinin, iqtisadiyyat üçün artmış daxili kreditlər 2012-ci ildə inflyasiya təzyiqini gücləndirə bilər. Taxıl istehsalının artması və qida emalının yaxşılaşması ərzaq istehsalını azaldaraq 2013-cü ildə inflyasiyanın artımının qarşısını ala bilər", - hesabatda qeyd olunur.
2012-ci ilin büdcəsi ÜDM-in 1,3 faiz səviyəsində kəsirini, dövlət xərclərinin isə 10 faiz artırılmasını nəzərdə tutur. Bu zaman ÜDM-də onların payının mühafizəkar səviyyəsinə əsaslanaraq 37 faiz olan gəlirlərin dörd faiz yüksəldilməsi planlaşdırılır.
"Neftin qiymətinin artması dövlətə əməkhaqqıları və pensiyaları kəskin artırmağa imkan verə bilər. Halbuki xərclərin kəskin artması iqtisadiyyata əlavə yüklənmə yarada və inflyasiyanı artıra bilər", - hesabatda deyilir.
Pul-kredit siyasəti əvvəlki kimi ölkədə inflyasiyanın qarşısının alınmasına yönəlib.
"Mərkəzi bank kapitalın adekvatlığı normativi üzərində prudensial nəzarəti və yoxlamanı gücləndirməyi, eləcə də banklararası bazarı paralel inkişaf etdirməklə risklərin idarə olunması keyfiyyətinin artırılmasını planlaşdırır. Mövcud kiçik özəl bankların birləşdirilməsi və Azərbaycan Beynəlxalq Bankının özəlləşdirilməsi daha çox rəqabət mühiti yaratmalı və bank xərclərini azaltmalıdır", - hesabatda vurğulanır.