Azərbaycan, Bakı, 30 may /Trend, müxbir A.Axundov/
2012-ci il aprelin 1-nə olan məlumata əsasən, Azərbaycanda 4,66 milyon ədəd ödəniş kartı var. Bu, mart ayı ərzində onların tədavüldə 0,71 faiz, 2011-cu ilin analoji dövr göstəricisi ilə müqayisədə isə 7,32 faiz artımı deməkdir. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) statistik hesabatında deyilir.
Martda bankomat və POS-terminallar vasitəsilə ödəniş kartları üzrə ümumi dövriyyə 784 milyon manat, əməliyyatların ümumi sayı isə 5,274 milyon ədəd təşkil edib.
Debet kartlar üzrə əməliyyatların ümumi sayı 4,96 milyon ədəd, həcmi isə 703 milyon manat təşkil edib.
Debet kartlar üzrə əməliyyatların ümumi sayından bankomatlar vasitəsilə 663 milyon manat məbləğində 4,523 milyon, POS-terminallar vasitəsilə 22 milyon manat məbləğində 271 min əməliyyat yerinə yetirilib.
2012-ci ilin martında kredit kartları vasitəsilə ümumi həcmi 81 milyon manat olan 314 min əməliyyat həyata keçirilib. Kredit kartları vasitəsilə əməliyyatların ümumi sayından 30 milyon manatlıq 100 min əməliyyat bankomatlar, 19 milyon manatlıq 57 min əməliyyat isə POS-terminallar vasitəsilə həyata keçirilib.
2012-ci il aprelin 1-nə olan məlumata əsasən, ölkədə 2168 bankomat fəaliyyət göstərib, onlardan 1198 ədədi Bakıda, 970 ədədi isə ölkənin digər şəhər və rayonlarında yerləşir. Bankomatların ümumi sayı il ərzində 239 ədəd və ya 12,39 faiz artıb.
2012-ci il aprelin 1-nə olan məlumata görə, POS-terminalların sayı 20994 ədəd təşkil edib ki, onlardan 19772 ədədi Bakıda, 1222 ədədi isə digər şəhər və rayonlarda yerləşir. POS-terminalların sayı 2011-ci ilin martından etibarən 12137 ədəd və ya 2,37 dəfə artıb.
