Azərbaycan, Bakı, 27 sentyabr /Trend, müxbir T.Cəfərov/
Qəzvin-Rəşt dəmir yolunun tikintisi çərçivəsində yeni yol qoyuluşuna başlanılıb.
Gilan əyalətində 167 kilometrlik dəmir yolunun salınması mərasimində İran Prezidentinin xüsusi köməkçisi və "Mehr Mandegar" təşkilatının sədri Əli Əkbər Mehrabian iştirak edib. Trend-in məlumatına görə, bu barədə İranın İRNA xəbər agentliyi məlumat verir.
Məlumata əsasən, sutkada 2 kilometr yol qoyuluşunun həyata keçirilməsi nəzərdə tutulur.
Mehrabian deyib ki, hazırda Qəzvin-Rəşt-Astara dəmir yolunun tikintisi işlərinin 75 faizi başa çatıb.
Mehrabian, həmçinin inşa işlərinin 10 faizi başa çatmış Qəzvin və Rəşt şəhərlərini birləşdirəcək tikilməkdə olan 11 kilometrlik dəmir yolu xəttinin tikintisi prosesi ilə də tanış olub.
İran KİV-inin məlumatına görə, Rusiya və İranın dəmiryol qurumları yaxın 20 gün ərzində Qəzvin-Rəşt-Astara dəmir yolunun tikintisi çərçivəsində yeni saziş imzalayacaqlar. Məlumata görə, sənədin imzalanması "Rusiya Dəmir Yolları" ASC-nın sədri Vladimir Yakuninin İrana səfəri çərçivəsində baş tutacaq.
İran rəsmiləri Qəzvin-Rəşt-Astara dəmir yolunun tikintisinin 2014-cü ilin martında başa çatacağını açıqlayıblar. Dəmiryol marşrutu mürəkkəbdir və 22 tunel və 15 xüsusi körpüdən ibarətdir. 15 tunelin tikintisinin 70 faizi tamamlanıb.
Xatırladaq ki, Qəzvin-Rəşt-Astara dəmir yolu Şimal-Cənub nəqliyyat dəhlizinin bir hissəsidir, onun tikintisi Azərbaycan, Rusiya və İran tərəfindən həyata keçirilir.