Azərbaycan, Bakı, 4 oktyabr /Trend, müxbir T.Cəfərov/
İranın Biləsuvar sərhəd keçid məntəqəsindən daşınan yüklərin həcmi artıb. Belə ki, Biləsuvar sərhəd keçid məntəqəsindən cari ilin ilk altı ayı ərzində (İranda il martın 21-də dəyişir) 170 000 tondan çox yük daşınıb. Bunu İranın Bİləsuvar sərhəd keçid məntəqəsinin rəhbəri Əhəd Məhəmmədi deyib. Trend-in məlumatına görə, bu barədə İSNA agentliyi xəbər verir.
Məhəmmədi Biləsuvar sərhəd keçid məntəqəsi vasitəsi ilə məhsulların ixrac və idxalının həcminin artdığını bildirib.
Onun sözlərinə görə, cari ilin 6 ayı ərzində Biləsuvar sərhəd keçid məntəqəsindən ixracatın həcmi çəki baxımından 50 faiz, dəyər baxımından 70 faiz artıb. "Həmin müddət ərzində 3400 ton məhsul ölkədən ixrac olunub. İxrac olunmuş məhsulun dəyəri 38,7 milyon dollar təşkil edir", - Məhəmmədi bildirib.
Onun sözlərinə görə, həmin dövrdə İrana idxalatın həcmi də artıb. Ölkəyə 16 min ton məhsul idxal olunub. "İdxal olunmuş məhsulun dəyəri 4,258 milyon dollar təşkil edir. Ötən ilin eyni dövrü ilə müqayisədə idxal edilən məhsullar çəkisinə görə 200 faiz, dəyərinə görə isə 350 faiz artıb", - Məhəmmədi bildirib.
O, İrana gətirilmiş məhsulların əsasən zavodlarda istifadə olunacaq xammal və avadanlıq olduğunu bildirib.
Onun sözlərinə görə, həmin müddət ərzində 458 min nəfər Biləsvar sərhəd keçid məntəqəsindən gediş-gəliş edib ki, bu da ötən ilin analoji dövrü ilə müqayisədə 20 faiz azdır.
İran Azərbaycan vətəndaşları üçün viza rejimini birtərəfli qaydada ləğv edib və 2010-cu il fevralın 1-dən etibarən İrana gedən Azərbaycan vətəndaşlarından viza tələb olunmur.
