Azərbaycan, Bakı, 22 oktyabr /Trend/
2012-ci ilin avqust ayı ərzində Azərbaycanın bank sektorunun kapitallaşdırılması 2,5 faiz, ilin əvvəli ilə müqayisədə 9,7 faiz artaraq, 2011-ci iln avqust ayına nisbətən isə 0,2 faiz azalaraq sentyabrın 1-nə 2324,6 milyon manat təşkil edib. Trend-in məlumatına görə, bu barədə bazar ertəsi Azərbaycan Mərkəzi Bankının (AMB) statistik hesabatında deyilir.
AMB-nin statistik məlumatına görə, kapitalı 10 milyon manatı ötən bankların sayı iyul ayı ilə müqayisədə eyni səviyyədə qalaraq, iyun ayına nisbətən 1 bank, 2011-ci ilin sonuna isə 3 bank azalaraq avqust ayının yekunları üzrə 39 bank təşkil edib. Bu kateqoriyadan olan bankların ölkənin bütün banklarının məcmu kapitalında xüsusi çəkisi avqustda 99 faiz təşkil edib. İlin əvvəlində bu göstərici 99,5 faiz olub.
Banklardan ikisində (0,8 faiz xüsusi çəki ilə) kapital 5 milyon manatla 10 milyon manat, bir bankda (0,2 faiz) 3,5 milyon manatla 5 milyon manat arasında, daha bir bankda isə 3,5 milyon manatadək formalaşıb.