Azərbaycan, Bakı, 22 noyabr /Trend, müxbir C.Nəsibova/
MDB ərazisində vahid iqtisadi zonanın yaradılması perspektivlidir. Bu barədə cümə axşamı Trend-ə Mərkəzi və Şərqi Avropa ölkələrinin Bank Assosiasiyasının (BACEE) baş katibi İstvan Lenqyel deyib.
"MDB ərazisində vahid iqtisadi zonanın yaradılması perspektivlidir və mövcud regionda inteqrasiya prosesi bundan sonra da inkişaf edəcək. Belə güclü vahid zonanın yaradılması MDB-nin iştirakçı ölkələri üçün faydalı olacaq. Lakin bu prosesdə ümumi valyutanın yaradılması ilk məsələlərdən deyil", - Lenqyel qeyd edib.
Onun fikrincə, vahid iqtisadi zona müsbət amildir, lakin avrozonadakı indiki problemləri nəzərə alaraq, vahid valyuta məsələlərində çox ehtiyatlı olmaq lazımdır.
Onun sözlərinə görə, vahid valyutaya kimi dəvət etmək, Yunanıstanı avrozona çərçivəsində saxlamaq cəhdlərinə baxmayaraq, avrozonaya tam uyğunlaşa bilməyən bu ölkənin nümunəsində nəyi nəzərdən keçirmək üzərində düşünmək vacibdir.
"Vahid valyuta məsələlərində ölkələrdəki inflyasiya və faiz dərəcələri səviyyəsindəki fərqləri nəzərə almaq əhəmiyyətlidir. Məsələn, Yunanıstanda göstərici 8 faizə, Almaniyada 2 faizə çatmışdı və Yunanıstan avrozonaya daxil olarkən bu ölkənin kreditləri qiymətdən düşdü və bu, problem yaratdı", - Lenqyel vurğulayıb.
Azərbaycanın vahid iqtisadi zonaya inteqrasiyası məsələsinə toxunan Bakı Banklararası Valyuta Birjasının (BBVB) rəhbəri Fərhad Əmirbəyov qeyd edib ki, mono iqtisadiyyat çərçivəsində Azərbaycanın ixrac etdiyi məhsul hazırda rəqabətə məruz qalmır.
"Neft və qaz tam satıla bilən məhsuldur və onların qiyməti ixracatçının iştirakı olmadan müəyyənləşdirilir. Tam ayrı keyfiyyətə malik məhsullarla bazara çıxış bizi dünya əmək bölgüsündə öz mövqeyimizi dəyişməyə məcbur edəcək, olduqca kəskin rəqabət yaranacaq", - Əmirbəyov bildirib.
Onun sözlərinə görə, belə şəraitdə təkcə milli dövlət çərçivəsində ölkənin dəstəyi kifayət etməyəcək.
"Müəyyən şərtlərlə başqalarının "oyun qaydaları"nı qəbul etmək lazım olacaq və müvafiq olaraq, inteqrasiya obyektiv prosesdir", - o deyib.