Azərbaycan, Bakı, 26 noyabr /Trend, müxbir C.Nəsibova/
MDB-nin öz vəsaitləri olan Rusiya və Azərbaycan kimi bəzi ölkələri bunları ölkə iqtisadiyyatına yatırmalıdırlar. Bu barədə bazar ertəsi Trend-ə Mərkəzi və Şərqi Avropa Ölkələri Bank Assosiasiyasının baş katibi İştvan Lendyel deyib.
"İnvestisiya sahəsində MDB ölkələri və Avropa İttifaqının əməkdaşlığına gəlincə, Avrozona ölkələrində hazırda imkanlar məhduddur, qonşu ölkələrlə əməkdaşlığa müəyyən vəsait ayrılıb, lakin onlar azaldılacaq. Hazırda Avropa İttifaqının büdcəsi müzakirə edilir və bu, üzv ölkələrin ÜDM-inin 1 faizini təşkil edir. Buna görə də öz vəsaitləri olan MDB ölkələri öz iqtisadiyyatlarına mümkün qədər çox investisiya yatırmalıdırlar", - Lendyel qeyd edib.
Onun sözlərinə görə, bu vəsaitlərdən bütün müsbət tərəfləri və imkanları, həm də riskləri nəzərə alaraq istifadə etmək lazımdır.
"Hesab edirəm ki, Azərbaycanda daxili investisiyalar üçün prioritet istiqamətlər elm, mədəniyyət, infrastruktur layihələri və səhiyyədir", - Lendyel bildirib.
