Azərbaycan, Bakı, 23 aprel /Trend, müxbir E.İsmayılov/
Beynəlxalq Əmək Təşkilatı (BƏT) Azərbaycana layiqli əməyin təminatı sahəsində dəstək göstərməkdə davam edəcək. Trend-in məlumatına görə, bu barədə çərşənbə axşamı Bakıda İslam Əməkdaşlıq Təşkilatına üzv ölkələrin əmək nazirliklərinin yüksəkvəzifəli rəsmilərinin iclasında əmək və əhalinin sosial müdafiəsi nazirinin müavini Natiq Məmmədov bildirib.
Onun sözlərinə görə, son illərdə ölkə BƏT-in dəstəyi ilə əmək bazarının vəziyyətinin yaxşılaşdırılması sahəsində ciddi uğurlar əldə edib.
"Hazırda BƏT zəhmətkeşlərin hüquqlarının müdafiəsinin yaxşılaşdırılması üzrə tədbirləri davam etdirmək məqsədilə Azərbaycanda layiqli əməyin təminatı üçün ikinci proqramı hazırlayır", - nazir müavini bildirib.
Məmmədovun sözlərinə görə, Azərbaycanda layiqli əməyin təminatı üzrə proqram iclasın bütün iştirakçılarına öyrənmək və öz ölkələrində mümkün tətbiqetmə məqsədilə təqdim edilib.
