Azərbaycan, Bakı, 5 avqust /Trend, müxbir A.Axundov/
Əmlak Məsələləri Dövlət Komitəsi (ƏMDK) dövlət əmlakına nəzarət qaydalarının təkmilləşdirilməsi üzrə təkliflər hazırlayır.
Trend-in məlumatına görə, bu barədə Komitənin Dövlət əmlakından səmərəli istifadəyə nəzarət və daxili audit şöbəsinin rəisi Zülfüqar Mansurovun "Daşınmaz Əmlak" jurnalında dərc edilən müsahibəsində deyilir.
Hazırda yeni qaydalar layihəsi müvafiq dövlət strukturları tərəfindən müzakirə edilir.
Mansurov bildirib: "Bəzi hallarda dövlət əmlakından qeyri-səmərəli istifadə ilə bağlı İnzibati Xətalar Məcəlləsinə əsasən protokol hazırlanaraq məhkəməyə təqdim edilsə də, nəzərdə tutulan cərimələr xəbərdarlıqla əvəz ounub. Dövlət əmlakından qeyri-səmərəli istifadə hallarının aradan qaldırılması və nəzarətin gücləndirilməsi üçün təklif edirik ki, İnzibati Xətalar Məcəlləsinin bu maddəsi üzrə işə baxmaq Komitəyə həvalə olunsun".
Onun sözlərinə görə, belə olarsa, işin effektivliyi, birbaşa cəza tədbirlərinin görülməsinin sürəti artacaq, çeviklik təmin olunacaq.