Azərbaycan, Bakı, 14 avqust /Trend, müxbir A. Axundov/
Azərbaycanın bank sektoru üzrə kapital adekvatlığı tələb olunan minimal limiti (12 faiz) üstələyərək yarım il ərzində sabit qalaraq 17 faiz təşkil edib.
Azərbaycan Mərkəzi Bankının (AMB) çərşənbə günü saytında yerləşdirdiyi maliyyə sabitliyi haqqında hesabata görə, cari ilin I yarısının sonuna I dərəcəli kapital adekvatlığı göstəricisi 0,4 faiz bəndi yüksələrək 13,4 faiz təşkil edib ki, bu da minimal normanı (I dərəcəli kapital adekvatlığı norması 6 faiz) 2 dəfədən çox üstəliyib.
Hesabatda bildirilir: "Hesabat dövründə bank sisteminin kapitallaşması prosesində müsbət meyillər davam etmiş, sistemin kapital adekvatlığı göstəriciləri məqbul səviyyədə olub".
2013-cü ilin I yarısında bank sisteminin məcmu kapitalının həcmi 11,7 faiz və ya 301,2 mln. manat artaraq 2 883,5 mln. manata çatıb. Məcmu kapitalın artımının əsas mənbəyi əvvəlki dövrlərdə olduğu kimi (79,5 faiz) nizamnamə kapitalı olub. Belə ki, nizamnamə kapitalı 171,4 mln. manat və ya 8,1 faiz artıb. Ümumi ehtiyatlar isə 10,7 faiz (20,4 mln. manat) yüksəlib.
Törəmə müəssisələrin və digər kredit təşkilatlarının səhmlərinə (paylarına), qeyri-maddi aktivlərə investisiyalar 9,1 faiz artaraq 330,2 mln. manat səviyyəsinə yüksəlib (cari ilin əvvəlinə 302,6 mln. manat təşkil edib).