Azərbaycan, Bakı, 26 avqust /Trend, müxbir E.Əliyev/
Azərbaycan Mərkəzi Bankı (AMB) tərəfindən ödəmə alətləri bazarının tənzimlənməsi üçün görülən tədbirlər effektivdir.
Bu barədə bazar ertəsi Trend-ə açıqlamasında "Millikart Group" prosessinq mərkəzinin icraçı direktoru Cəlal Orucov bildirib:
"Bugünkü gün AMB düzgün mövqe seçib. AMB xırdalıqlara müdaxilə etmir, kifayət qədər aydın çərçivələr verir".
Orucovun sözlərinə görə, ödəmə alətləri bazarı çox sürətlə dəyişən bazardır: "Əgər o həddindən artıq nizamlansa, onda istənilən normativ-hüquqi akt onun hazırlanması vaxtı və ya onun sonrakı tətbiqi zamanı mənəvi cəhətdən köhnələ bilər. Çünki onun tənzimləyəcəyi xidmət tanınmaz dərəcəyə qədər dəyişə və ya ümumiyyətlə mövcud olmağı dayandıra bilər. Bu bazarda həddindən artıq tənzimlənmə effektiv deyil və Mərkəzi Bank ən lazımı formada fəaliyyət göstərir - çərçivələri müəyyənləşdirir, oyunun şərtlərini və bu qaydalar çərçivəsində bazarı tənzimləyir, zəif yerləri üzə çıxardır və onlara reaksiya verir".
Onun fikrincə, digər ölkələrdə əks nümunələr var idi ki, bu da az effektli idi və bank sektorunda narazılıq doğururdu.
Bu sahənin Azərbaycanda tənzimlənməsi üçün ölkədə ilk dəfə "Ödəmə xidmətləri haqqında" qanun layihəsi hazırlanıb.