Azərbaycan, Bakı, 23 yanvar /Trend, müxbir A.Axundov/
2013-cü ildə Azərbaycanın nəqliyyat sektoru ilə 218 milyon ton yük daşınıb ki, bu da 2012-ci ilin göstəricisindən 3,4 faiz çoxdur. Trend-in məlumatına görə, bu barədə cümə axşamı Azərbaycan Dövlət Statistika Komitəsinin hesabatında deyilir.
Daşınmış yüklərin ümumi həcminin 75 faizi özəl sektorun payına düşür.
Ötən il ərzində daşınmış yüklərin ümumi həcminin 57,4 faizi avtomobil nəqliyyatı ilə, 26,6 faizi boru kəmərləri, 10,7 faizi dəmiryol və 5,3 faizi isə dəniz nəqliyyatı ilə daşınıb.
2013-cü ildə sərnişin nəqliyyatı ilə təqribən 1,75 milyarddan artıq insan daşınıb ki, bu da 2012-ci ilin göstəricisindən 8 faiz çoxdur. Sərnişinlərin əsas hissəsi (87,9 faiz) avtomobil nəqliyyatı və metro ilə (11,8 faiz) daşınıb.
Dəmiryol nəqliyyatı ilə 23,2 milyon ton yük daşınıb ki, bu da 2012-ci ilin göstəricisindən 0,5 faiz çoxdur.
Hesabat dövründə dəniz nəqliyyatı ilə 11,5 milyon ton yük daşınıb. 2012-ci ildə isə bu rəqəm 12,4 milyon tona bərabər olub. Daşınan yüklərin əsas həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi 2013-cü ildə 12,4 milyon ton təşkil edib.
Bu dövrdə avtomobil nəqliyyatı ilə 125,2 milyon ton yük daşınıb. Bu, 2012-ci ilin göstəricisindən 6 faiz çoxdur.
Sərnişin daşımanın həcmi 1,53 milyard nəfərİ (artım 8,3 faiz) ÖTÜB. Sərnişinlərin 96,3 faizi avtobuslarla, 3,7 faizi minik avtomobilləri ilə daşınıb.
Metropolitenlə sərnişindaşımanın həcmi 206,7 milyon nəfər təşkil edib. Bu da 2012-ci illə müqayisədə 5,6 faiz çoxdur.
Ötən il hava nəqliyyatı ilə 1,66 milyondan çox sərnişin daşınıb. Bu, 2012-ci ilin göstəricisindən 4,2 faiz çox olub. Bu növdə daşımaların 0,4 faizi özəl sektorun payına düşüb.