Azərbaycan, Bakı, 15 fevral /Trend, müxbir E.Əliyev/
Azərbaycanda nağdsız hesablaşmaların inkişafının stimullaşdırılmasını davam etdirmək lazımdır. Bunu Trend-ə "Millikart Group" MMC-nin icraçı direktoru Cəlal Orucov deyib.
Onun sözlərinə görə, son 10 il ərzində ölkədə nağdsız hesablaşmalar bazarı xeyli artıb: "2003-cü illə müqayisədə prosessinq mərkəzimizdə xidmət göstərən POS-terminalların sayı 1,5 dəfədən çox, internet ödənişlərin həcmi isə təqribən 80 faiz artıb".
C.Orucov qeyd edib ki, əsas infrastruktur artıq yaradılıb: "Hazırda bazarda 5 milyondan çox kart var, lakin onların çoxu debet kartlardır. Digər problem isə ölkədə quraşdırılmış 30 mindən artıq POS-terminalın Bakı və Sumqayıt şəhərində olmasıdır. Statistikaya nəzər salsaq görərik ki, regionlarda POS-terminalların sayı və onlar üzrə əməliyyatların həcmi xeyli aşağıdır".
O, bildirib ki, nağdsız hesablaşmalar qarşısında bir neçə çağırış dayanır: "Birinci çağırış ondan ibarətdir ki, regionlarda terminalların quraşdırılmasını və onlardan düzgün istifadəni genişləndirmək lazımdır. Digər tərəfdən, buna baxmayaraq, kifayət qədər ödəniş kartı buraxılıb, onlar üzrə əməliyyatların həcmi isə çox aşağıdır və bu amil kart sahiblərini nağdsız hesablaşmalara cəlb etmək üzrə təşviq və stimullaşdırma tədbirlərini zəruri edir. Üçüncü vəzifə ödəniş kartları olmayan əhali kateqoriyasını nağdsız əməliyyatlara cəlb etməkdir. Azərbaycan əhalisinin sayı 9 milyonu ötür və bu ondan xəbər verir ki, nəzərəçarpacaq dərəcədə potensial artımı var".
Ekspert hesab edir ki, bu məsələləri həll etmək üçün bir neçə yol var: "Regiondakı problemlərin səbəbləri terminalların bahalı olması və dövriyyənin azlığıdır. Kiçik biznesin kifayət qədər dövriyyəsi olmasa, nağdsız hesablaşmaların tətbiqində maraqlı olmaz. Bu problem mobil POS-terminallar vasitəsilə həll edilə bilər. Bunun üçün mobil qurğuya xüsusi əlavə qoşulur. Belə terminalların dəyəri klassik POS-terminallarla müqayisədə daha azdır və daha mobildir. Hesab edirəm ki, belə terminallar xüsusilə regionlarda kiçik sahibkarlıqda daha populyar olacaq".
Onun sözlərinə görə, kart sahiblərini nağdsız hesablaşmalara cəlb etmək üçün bonus proqramları hazırlamaq və tətbiq etmək lazımdır: "Məhz bu, taksit sistemlərinin tətbiqi ilə kredit kartları sahəsində olduğu kimi, artımı təmin etməyə imkan verəcək. Bazarda artıq təmassız kartlar var və hesab edirəm ki, bu istiqaməti də inkişaf etdirmək lazımdır. Çünki müştəri üçün ondan istifadə etmək asandır, belə ki, PİN-kod daxil etmək və ya çek yazmaq tələb olunmur".
