Azərbaycan, Bakı, 27 mart /Trend, müxbir E.Əliyev/
2014-cü ilin yanvar-fevral aylarında Azərbaycan Gürcüstandan dəyəri 2,22 milyon dollar olan 30,33 min ton sement idxal edib. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
Hesabatda bildirilir ki, bu sahənin xüsusi çəkisi Gürcüstandan Azərbaycana ümumi ixracın həcminin 2,83 faizini təşkil edib.
İl ərzində Gürcüstandan sement idxalı 45,85 faiz və ya 25,22 min ton azalıb. Müqayisə üçün: 2013-cü ilin yanvar-fevral aylarında Gürcüstandan Azərbaycana 4,1 milyon dollar məbləğində 55,55 min ton sement idxal edilib.
Hesabat dövründə Gürcüstandan Azərbaycana polad armatur idxalında artım müşahidə olunub. Belə ki, 2014-cü ilin yanvar-fevral aylarında Azərbaycana 7,87 milyon dollar dəyərində 12,55 min ton polad armatur idxal edilib ki, bu da ötən ilin analoji dövr göstəricisindən 84,3 faiz çoxdur. Müqayisə üçün: 2013-cü ilin yanvar-fevral aylarında Gürcüstandan Azərbaycana 4,27 milyon dollar həcmində 6,79 min ton polad armatur idxal edilib.
Gürcüstandan Azərbaycana ixracın strukturunda bu kateqoriyanın xüsusi çəkisi 10,02 faiz təşkil edib.
2014-cü ilin yanvar-fevral aylarında Gürcüstandan Azərbaycana 74,53 milyon dollar dəyərində mal (və ya hesabat dövründə ölkənin ixracının ümumi həcminin 24,3 faizi) ixrac olunub. Ötən ilin eyni dövrünə nisbətən Azərbaycana ixrac 14,47 faiz azalıb. Müqayisə üçün: 2013-cü ilin yanvar-fevral aylarında Azərbaycana 87,14 milyon dollar dəyərində Gürcüstan malları ixrac olunub.
