Azərbaycan, Bakı, 30 may /Trend, müxbir E.Əliyev/
"Millikart Group" ölkədə ilk dəfə mobil POS-terminalların təqdimatını keçirmək niyyətindədir. Bu barədə cümə günü Trend-ə prossesinq mərkəzinin rəhbəri Cəlal Orucov bildirib.
O deyib: "Qurğunun təqdimatı iyunda Visa beynəlxalq ödəniş mərkəzi ilə birlikdə keçiriləcək. Bizim tərəfimizdən artıq 100 terminal alınıb və çatdırılıb, hazırda potensial müştərilərlə danışıqlar gedir".
Onun sözlərinə görə, "Millikart" bu məhsula tələbin qiymətləndirilməsinə ehtiyatla yanaşacaq: "Hələlik ölkədə belə texnologiyalar tətbiq edilmir. Biz potensial tərəfdaşların təkliflərindən çıxış edəcəyik və ona görə də birinci mərhələdə az sayda mobil terminallar gətirilib".
Orucov Azərbaycanda mobil POS terminalların tətbiqi ideyasının hələ fevral ayında səsləndirib. Onun sözlərinə görə, nağdsız hesablaşmalardan az istifadənin səbəbi regionlarda terminalların bahalığı və onların dövriyyəsinin kiçik olmasıdır: "Əgər kifayət qədər dövriyyəyə malik deyilsə, kiçik biznes nağdsız hesablaşmaların genişləndirilməsində maraqlı deyil. Bu problemin həlli mobil qurğuya xüsusi vasitənin qoşulduğu mobil terminallar ola bilər. Hesab edirəm ki, belə terminallar xüsusilə ölkənin regionlarında kiçik biznesdə daha çox populyar olacaq".
