Azərbaycan, Bakı, 6 iyun/Trend, müxbir E. Əliyev/
Beynəlxalq Valyuta Fondu (BVF) cari ilin sonuna Azərbaycanda özəl sektorun bank kreditləşməsinin artım tempinin təqribən 3 dəfə azalacağını proqnozlaşdırır.
BVF-nin proqnozlarına əsasən, özəl sektorun bank kreditləşməsinin artım dinamikası cari il 27,6 faizdən (2013-cü ilin sonuna) 10,3 faizədək azalacaq. Fond, eyni zamanda 2015-ci ildə ölkə bankları tərəfindən özəl sektorun kreditləşməsinin artımını 15,1 faiz səviyyəsində proqnozlaşdırır.
Qeyd edək ki, bu azalma Azərbaycan Mərkəzi Bankın (AMB) siyasətinin nəticəsidir. Mərkəzi Bank bankları iqtisadiyyatın real sektorunu aktiv kreditləşdirməyə məcbur etməyə çalışır. AMB ötən ilin sonunda ölkə banklarından istehlak kreditlərinin verilməsi üzərində nəzarəti gücləndirməyi tələb edib.
2014-cü ilin mayın 1-nə olan məlumata görə, ölkənin kommersiya bankları tərəfindən real sektorun kreditləşməsinin həcmi ilin əvvəlindən 5,38 faiz artaraq 16,25 milyard manata çatıb.