Azərbaycan, Bakı, 30 iyun /Trend, müxbir Emin Əliyev/
Azərbaycanın yeganə təkrar sığorta şirkəti AzRe yaxın gələcəkdə beynəlxalq reytinq almaq niyyətindədir. Trend-in məlumatına görə, bunu AzRe-nin İdarə heyətinin sədri Fuad Quliyev Rumıniyanın PR şirkəti tərəfindən dərc edilən və Azərbaycanın sığorta bazarına həsr edilmiş "Media XPRIMM" jurnalına müsahibəsində deyib.
Jurnalın xüsusi buraxılışı Bakıda keçirilmiş V beynəlxalq sığorta forumuna həsr edilib.
Onun sözlərinə görə, ümumilikdə Azərbaycanın sığorta bazarının inkişafından sonra AzRe-nin göstəriciləri də artdı: "2013-cü ildə yığımlar əvvəlki illə müqayisədə 30 faiz artaraq 39 milyon manata çatıb. Bu inkişafın əsas amilləri bizim bazarda ən yaxşı ekspertiza risklərinin olması və əcnəbi təkrar sığortaçılar qarşısında üstünlüyüdür: biz dövlət dilində işləyirik və bununla da müxtəlif sənədlərin tərcüməsinə ehtiyac qalmır, həmçinin risklərin anderraytinqində fəal iştirak edirik".
F.Quliyev qeyd edib ki, şirkət öhdəliklər üzrə tutumunu 20 milyon manatadək artırıb: "Məqsəd bazarda olan tələbatı qarşılamağı təmin etmək iqtidarında olmaqdır. Şirkət retrosessiyaları səmərəli idarə edir - belə risklərin 90 faizi "Standard & Poor's"dan "A" səviyyəli və daha yüksək reytinq almış təkrar sığorta şirkətlərinə verilib. AzRe-nin fəaliyyətinin prioritetləri maliyyə sabitliyi, ölçülüb biçilmiş risklər siyasəti və yüksək ödəmə qabiliyyətidir. Bu amillər sığorta bazarının inkişafı ilə birlikdə AzRe-də Azərbaycandakı xarici təkrar sığortanın 50 faiz cəmləşməsinə gətirib çıxardı".
O bildirib ki, şirkət yerli bazarda gələcək artımla bağlı çağırışları başa düşür: "Buna görə də beynəlxalq reytinqin alınması üzərində iş aparırıq ki, bu da AzRe-yə xarici bazarlarda inkişaf etməyə imkan verəcək. Reytinqin alınmasına hazırlıq ötən il başlayıb və ümid edirəm ki, proses yaxın 3-4 ayda başa çatacaq".
