Azərbaycan, Bakı, 11 avqust /Trend, müxbir Təmkin Cəfərov/
Azərbaycan elektrik enerjisini İran vasitəsi ilə Əfqanıstan və İraqa nəql edəcək. Trend-in məlumatına görə, bunu İranın Azərbaycandakı səfiri Möhsün Pakayin ötən axşam İRİNN kanalında "Mərkəzi Asiya və Qafqaz jurnalı" adlı verilişdə çıxışında deyib.
İRİNN kanalı ötən axşam "Mərkəzi Asiya və Qafqaz jurnalı" adlı verilişdə Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 9-cu iclasının nəticələri və əldə olunan nailiyyətlərlə bağlı xüsusi buraxılış hazırlayıb və hazırda Tehranda olan İranın Azərbaycandakı səfiri M.Pakayin həmin verilişin qonağı olub.
M.Pakayin deyib ki, Azərbaycanın elektrik enerjisinin İran vasitəsi ilə İraq və Əfqanıstana nəqli məsələsi Azərbaycanla İran arasında ümumilikdə razılaşdırılıb. Yaxın zamanlarda Azərbaycandan İrana nümayəndə heyəti səfər edəcək və həmin səfər zamanı bu barədə sazişin imzalanması gözlənilir.
Qeyd edək ki, avqustun 6-da Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 9-cu iclası keçirilib. İclas çərçivəsində iki ölkə arasında energetika sahəsində elektrik enerjisinin nəqli və mübadiləsi üzrə əməkdaşlığı genişləndirmək barədə razılıq əldə olunub.
