Azərbaycan, Bakı, 26 avqust /Trend, müxbir Emin Əliyev/
Azərbaycan Mərkəzi Bankı (AMB) 120 faizli risk səviyyəli qrupu əlavə etməklə risk dərəcələri üzrə aktivlərin təsnifləşdirilməsi strukturunu dəyişməyi planlaşdırır. Həmin qrupa təminatı olmayan istehlak kreditləri daxil olacaq.
Trend-in məlumatına görə, qeyd edilənlər "Bank kapitalının və onun adekvatlığının hesablanması Qaydaları"na dəyişikliklərdə öz əksini tapıb. Dəyişikliklər layihəsi AMB-nin saytında dərc edilib.
AMB, həmçinin aidiyyəti şəxslərə, yəni bilavasitə kreditor banka aidiyyəti olan şəxslərə və ya onlar adından hərəkət edən şəxslərə verilmiş kreditlər anlayışını daxil edib. Belə kreditlər üzrə nisbi əmsal cari ilin sonunadək 0 faiz və 2015-ci ildə 20 faiz, həmçinin 2016, 2017 və 2018-ci illərdə müvafiq olaraq 40, 60 və 80 faiz səviyyəsində müəyyən edilib. 2019-cu il yanvarın 1-dən belə kreditlər üzrə göstərici 100 faiz səviyyəsində müəyyənləşdiriləcək.
Dəyişikliklərə əsasən, bundan sonra bankın kapitalına ən azı 5 il müddətinə buraxılmış yalnız qiymətli kağızlar və digər hibrid alətlər üzrə əldə edilmiş vəsaitlər daxil edilə bilər.
Bundan başqa, qaydaya əlavə edilən 7.4-cü bəndə əsasən, kapitalın hibrid elementləri və subordinasiya borc öhdəlikləri ödəniş müddətinin başa çatmasına qalan son 5 il ərzində II dərəcəli kapitalda ümumi dəyəri hər il 20 faiz azaldılmaqla nəzərə alınır.
Bununla da bankın məcmu kapitalının adekvatlığının göstəricisi yeni qayda ilə hesablanacaq: yəni o, məcmu kapitalın həcmləri və aidiyyəti şəxslərin yuxarıda göstərilən artırılmış və aktivlərin risk səviyyəsi üzrə tarazlaşdırlmış əmsal kreditləri arasındakı fərq nisbətindən formalaşacaq.
Banklar məcmu kapitalın adekvatlıq əmsalını 12 faizi ötməyən səviyyədə, I dərəcəli kapital adekvatlığının əmsalını isə 6 faiz səviyyəsində saxlamalıdırlar.