Azərbaycan, Bakı, 4 sentyabr /Trend, müxbir Zülfiyyə Qurbanova/
2014-cü ilin yanvar-iyul aylarının yekunları üzrə Azərbaycan banklarının depozit bazası 16,7 faiz, illik hesablamada isə 25 faiz artıb. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Avqustun 1-nə olan məlumata görə, bank depozitlərinin, hüquqi və fiziki şəxslərin əmanətlərinin ümumi həcmi 2013-cü il iyulun əvvəlinə olan 11 655,1 milyon manata nisbətdə 14 558,1 milyon manat təşkil edib.
Ümumi həcmin 7 355,2 milyon manatı manatla vəsaitlərin payına düşüb ki, bunun da 2 579,4 milyon manatını tələb olunanadək depozitlər, 4 775,8 milyon manatını isə müddətli depozitlər təşkil edir. Xarici valyutadakı vəsaitlərin payına 7 203 milyon manat (müvafiq olaraq 1 794,1 milyon manat və 5 408Ş9 milyon manat) düşüb.
Ötən ilin analoji dövrü ilə müqayisədə fiziki şəxslərin əmanətləri 15,3 faiz, hüquqi şəxslərin depozitlərinin həcmi 35,17 faiz artıb. 7 ay ərzində bu göstəricilər müvafiq olaraq 8,51 faiz və 25,3 faiz artıb.
2014-cü ilin yanvar-iyul aylarında fiziki şəxslərin ölkənin banklarındakı əmanətlərinin həcmi 2013-cü ilin analoji dövründəki 6019,3 milyon manata nisbətdə 6 940 milyon manat təşkil edib.
Mərkəzi Bankın məlumatına görə, əhali tərəfindən 4 403,6 milyon manat (63,45 faiz) milli valyutada, 2 536,4 milyon manat isə SDV-də yerləşdirilib.
2014-cü ilin yanvar-iyul aylarının yekunları üzrə maliyyə təşkilatlarının depozitlərinin həcmi 4 083 milyon manat təşkil edib. Bu rəqəm 2013-cü ilin analoji dövründə 2 882,1 milyon manat olub.
Qeyri-maliyyə təşkilatlarının depozitlərinin həcmi 3 535,1 milyon manat təşkil edib. Bu rəqəm 2013-cü ilin eyni dövrünün yekunları üzrə 2 753,7 milyon manat olub. Hüquqi şəxslərin depozitlərinin həcmi 7618,1 milyon manat təşkil edib. Bu göstərici 2013-cü ilin analoji dövründə 5635,8 milyon manat olub.
Qeyd edək ki, Azərbaycanda 44 bank fəaliyyyət göstərir.
