Azərbaycan, Bakı, 3 noyabr /Trend/
"Unibank" müştəriləri banka gəlmədən belə, bank xidmətlərindən istifadə edə, müqavilələri imzalaya biləcəklər. Çünki Unibank tezliklə "Asan İmza" (Mobil imza) xidmətinə qoşulacaq. Bu barədə bazar ertəsi Trend-ə bankdan məlumat verilib.
Bankın həm fiziki, həm də korporativ müştəriləri bu xidmətdən istifadə etməklə, rahat və təhlükəsiz şəkildə bank əməliyyatlarını apara biləcəklər. "Asan İmza" (Mobil imza) elektron-xidmətlərə daxil olan və rəqəmsal imzalar edən zaman kimliyini təsdiqləmək üçün müştərinin mobil identifikasiyasıdır. "Asan İmza" (Mobil imza) bütün mövcud e-xidmətlərdən istifadəni mümkün edir. Yeni xidmət Unibank müştərilərinə filiallara gəlmədən, istənilən məsafədən bank xidmətlərindən istifadə imkanı verir. "Asan İmza" texnologiyası onlayn bankçılıq xidmətlərini genişləndirməyə imkan verən bir sıra əhəmiyyətli üstünlüklər təqdim edir. Bunlardan xüsusilə "Asan İmza"nın ölkə qanunvericiliyi nöqteyi-nəzərindən yeganə qanuni mobil elektron imza olması və elektron mühitdə avtorizasiyanın və sənədlərin imzalanmasının rahatlığı, yüksək etibarlılığı və təhlükəsizliyi təmin etməsini vurğulamaq olar.
"Asan İmza" mobil elektron imza - mobil telefonu rəqəmsal şəxsiyyət vəsiqəsi və imza vasitəsi kimi istifadə etməyə imkan verən texnologiyadır. "Asan İmza" texnologiyasını önə çıxaran başlıca cəhət smart kartın oxunması üçün əlavə qurğuların və proqram təminatının istifadəsinə ehtiyacın olmamasıdır. Xidmətin istifadəsi üçün autentifikasiya və elektron imza rəqəmsal açarlarının saxlanıldığı SIM karta əsaslanan mobil telefonun mövcudluğu kifayətdir. Ətraflı məlumat üçün: www.asanimza.az
"Asan İmza" mobil elektron imza sistemində istifadə olunan autentifikasiya və elektron imza sertifikatları Vergilər Nazirliyinin Asan Sertifikat Xidmətləri Mərkəzi (ASXM) tərəfindən təqdim edilir. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və Rabitə və Yüksək Texnologiyalar Nazirliyi ilə birgə yaradılmış və Rabitə və Yüksək Texnologiyalar Nazirliyində akkreditasiyadan keçmiş ASXM dövlət və yerli özünüidarəetmə orqanlarının əməkdaşlarına, hüquqi və fiziki şəxslərə təkmil sertifikatlar təqdim etmək hüququna malikdir. Ətraflı məlumat üçün: www.asxm.gov.az
Müştəri məmnuniyyətini öz fəaliyyətində hər zaman əsas tutan Unibank, daim öz xidmətlərində müasir texnologiyanın yeniliklərini tətbiq edir. Bank bundan sonra da fəaliyyətində texnoloji yeniliklər həyata keçirməkdə davam edəcək.
Ətraflı məlumatı (012) 117 nömrəli telefondan, Bankın saytından (www.unibank.az) və yaxud facebook səhifəsindən (www.facebook.com/unibank.az) əldə etmək olar.
Unibank - hər kəsin bankı