Mərkəzi Bank bankların kapitalına qarşı tələbləri yumşaltdı (ƏLAVƏ OLUNUB)
Bakı. Azad Həsənli - Trend:
Azərbaycan Mərkəzi Bankı (AMB) 2015-ci il dekabrın 29-dan kapitalın adekvatlıq əmsalının həcmini 12-dən 10 faizədək, bankların birinci dərəcəli kapitalının adekvatlıq əmsalını isə 6-dan 5 faizədək azaldıb.
Trend-in məlumatına görə, bu, "Bank kapitalının və onun adekvatlığının hesablanması Qaydaları"nda dəyişikliklərdə nəzərdə tutulub.
AMB, həmçinin "leveric" (aktivlərin artımını kapitalın artımı ilə bağlayan alət) səviyyəsini 6-dan 5 faizədək endirib.
Qeyd edək ki, Mərkəzi Bank 2011-ci ilin fevralından "leverec" normativinin fəaliyyətini bərpa edib (2003-cü ildə ləğv edilmişdi) və onun hesablanması qaydalarına balans aktivləri ilə yanaşı, balansdankənar aktivlər də daxil edilmişdi. Bununla belə, tələb 8 faiz həcmində (ləğvdən əvvəlki 6 faizə qarşı) müəyyən edilmişdi, çünki "leverec" normativi bankın güclü artımının məhdudlaşdırılması üçün nəzərdə tutulmuşdu.
