Azərbaycanın Maliyyə nazirliyi 2010-cu ilədək ölkənin sığorta bazarında xarici kapital payının liberallaşdırılmasını məqsədəuyğun hesab etmir. Nazirliyin dövlət sığorta nəzarəti şöbəsinin rəisi Bəybala Xankişiyev Trend ə bildirib ki, Dünya Ticarət Təşkilatı (DTT) Azərbaycana "Sığorta haqqında" qanundan xarici sığorta kapitalının 49% - 51% nisbətində pay imkanını göstərən bəndin çıxarılmasını təklif edir. "Bu, mümkün deyil, çünki bu, dünyanın iri sığorta nəhənglərinin ölkənin şirkətlərini sıradan çıxarmasına səbəb olacaq.Bununla əlaqədar olaraq qanunun 2006-cı ildə parlamentə təqdim olunacaq yeni düzəlişində həmin nisbət saxlanılır" -deyə B.Xankişiyev öz qənaətini bildirib.
Onun sözlərinə görə, sığorta biznesin hər il 400 mlrd. manat vəsait toplanmasına imkan verən sərfəli növlərindən biri hesab olunur. Bu vəsaitlər öz növbəsində iqtisadiyyatın inkişafına sərmayə olaraq qoyulur, bütövlükdə respublikanın inkişafına yönəldilir.
Sığorta bazarında liberallaşdırma ölkənin sığorta şirkətləri müəyyən dərəcədə inkişaf əldə etdikdən sonra mümkündür. Bununla bağlı olaraq hər il bu şirkətlərin nizamnamə kapitalına tələb artır. Bu, hər il 500 mln. köhnə manat həcmində artır və 2010-cu ilədək NK-nin minimum həcmi 5 mlrd. manat təşkil etməlidir. Bununla bağlı nəzarət orqanı dayanmaq niyyətində deyil, çünki şirkətlərin NK nə qədər çox olarsa, respublikada sığorta risqləri də bir o qədər çox qala bilər.
Yeri gəlmişkən, sığorta bazarında xarici kapitalın liberallaşdırılması məsələsi ABŞ hökuməti tərəfindən Azərbaycan-Amerika hökumətlərarası işçi qrupunda da dəfələrlə qaldırılıb.
