İran tərəfinin Ələt-Astara avtomobil magistralının bir hissəsinin yenidən qurulması layihəsinin maliyyələşdirilməsi ilə bağlı kredit şərtləri Azərbaycan tərəfini qane etmir. Bu barədə Nəqliyyat Nazirliyinin "Yolnəqliyyatservis" Departamentinin başçısı Cavid Qurbanov məlumatv verib.
İran İxrac bankı magistralın bir hissəsinin yenidən qurulması üçün $40 mln vəsait ayırmalı idi. Ancaq bankın şərtləri çox ağırdır. Əgər İran tərəfi kreditin ayrılma şərtlərini dəyişdirməsə, Azərbaycan bu kreditdən imtina edə bilər", - deyə C.Qurbanov qeyd edib.
Əsas problemlər xüsusilə, kreditin qaytarılmasının güzəştli dövrü ilə bağlıdır. İranın şərtlərinə əsasən, bu müddət 2-3 üçün nəzərdə tutulub. Bundan başqa, əsas borcun qaytarılma müddəti 12 il təşkil edir. Ancaq Azərbaycanda yol layihələri üçün kreditlərin qaytarılma müddəti ən azı 15 ilə bərabərdir. Bundan başqa, Nazirliyi kreditin faiz dərəcəsi (2%) də qane etmir.
Layihənin ümumi dəyəri $350 mln. həcmində qiymətləndirilir. Vəsaitin $200 mln məbləğində bir hissəsini Dünya bankı, $100 mln-nu isə Asiya İnkişaf Bankı ayıracaq. DB-nin vəsaiti ilə magistralın Ələtdən Masallıyadək, AİB-in isə Masallıdan Astarayadək olan hissəsi yenidən qurulacaq.
