Azərbaycanın Torpaq və Xəritəçəkmə üzrə dövlət komitəsinin nümayəndə heyəti İstanbulda işgüzar səfərdə olub.
Dövlət strukturundan Trend ə verilən məlumata görə, komitə sədri Qərib Məmmədovun rəhbərlik etdiyi nümayəndə heyəti Türkiyəyə Hərbi Tipoqrafiya İdarəsinin dəvəti ilə səfər edib.
Səfərdə məqsəd Türkiyə və Azərbaycan hökumətləri arasında xəritəçəkmə sahəsində elmi və texniki əməkdaşlıq haqqında sazişə uyğun olaraq əməkdaşlığın inkişaf etdirilməsindən ibarət olub. Səfər çərçivəsində dövlət peyk geodeziya şəbəkələrinin modernləşdirilməsi, qravimetriya sahəsinin genişləndirilməsi, peyk geodeziya texnologiyası əsasında topoqrafik xəritələrin tərtibi, informasiya-coğrafi sistemlərin yaradılması və s. üzrə görülən işlər müzakirə olunub.
Səfər zamanı torpaq ehtiyatlarından istifadə və bu ehtiyatlara dövlət nəzarəti üzrə əməkdaşlığın inkişafı və fikir mübadiləsi ilə bağlı məsələlər nəzərdən keçirilib.
Strukturdan bildirilib ki, iyulun 2-ci yarısında Türkiyə nümayəndələrinin Azərbaycana cavab səfəri gözlənilir.
