Bu gün Dünya bankının nəqliyyat missiyası Bakıya gələcək. Missiyaya bankın yol infrastrukturu üzrə mütəxəssisi Olivye Le Ber başçılıq edəcək. Bu barədə Trend ə DB-nin Bakı nümayəndəliyindən xəbər veriblər. Səfərin əsas məqsədi avtomagistralların yenidən qurulması sahəsində mövcud layihələrin reallaşmasının icmalının aparılmasıdır. Onların maliyyələşdirilməsi bir layihə kimi həyata keçirilir.
Bu layihədə Ələt-Masallı avtomagistralının marşrutunun genişləndirilməsi və dəyişdirilməsi, həmçinin Bakını respublikanın qərb rayonları ilə birləşdirən Bakı-Şamaxı-Muğan yolunun təmiri nəzərdə tutulub. Bu layihə nəticəsində Ələt-Masallı yolunun uzunluğu 230 km-dən 200 km-ə qədər qısalacaq. Hazırda DB həmçinin Gəncə-Qazax avtomobil yolunun tikintisini də maliyyələşdirir.
DB bu yolların yenidən qurulması üçün 200 milyon ABŞ dolları məbləğində kredtin ayrılması barədə qərar qəbul edib. Bu iki layihə üçün çatışmayan vəsaitlər artıq ikinci kredit çərçivəsində ayrıla bilər. Bank missiyası yolların yenidən qurulması üzrə bu vəsaitlərin ayrılması məsələsini və digər aspektləri nəzərdən keçirəcək.
