Azərbaycan Milli Bankı və Dünya Bankı ölkənin maliyyə sisteminə dəstək üzrə ikinci layihənin hazırlanması istiqamətində məsləhətləşmələri davam etdirir. AMB-nin baş direktoru Rüfət Aslanlının Trend ə verdiyi məlumata görə, avqustun sonunadək layihəyə daxil ediləcək sublayihələrə dair təklifləri DB-yə təqdim etmək planlaşdırılır. Bundan sonra danışıqların növbəti raundu keçiriləcək.
"Layihənin konsepsiyası bundan ibarətdir ki, DB bu layihəni həm maliyyə, həm də texniki yardım baxımından dəstəkləməyə hazırdır. Hazırda təkliflər işlənir. Daha sonra DB ilə bankın hansı istiqamətləri dəstəkləməyə hazır olduğunu müzakirə edəcəyik", - deyə baş direktor bildirib.
İlkin məlumatlara görə, bu, ölkənin maliyyə sektoruna dəstək üçün Beynəlxalq İnkişaf Assosiasiyasının şərtləri ilə ayrılan sonuncu kredit olacaq. R.Aslanlının sözlərinə görə, bu layihəyə bankın maliyyə ili üçün təsdiqlənmiş limit çərçivəsində BİA-nın istifadə olunmamış vəsaiti də yönəldiləcək. Müvafiq olaraq layihənin büdcəsi kredit ehtiyatlarının qalıqlarının bitməsindən sonra müəyyən ediləcək.
DB Azərbaycanın maliyyə sektoruna texniki yardım üzrə birinci layihəyə $5,4 mln ayırıb.