Azərbaycan Milli Bankının (AMB) idarə heyəti ölkədə fəaliyyət göstərən bankların kapitallaşdırma məsələsinin müzakirəsini davam etdirir. AMB-nin baş direktoru Rüfət Aslanlının Trend ə verdiyi xəbərə görə, yığıncaqda hər bir bankla və hər bir banklar qrupu ilə ayrı-ayrılıqda müzakirələr aparılıb. "Biz hər bir bankın kapitalını qiymətləndirdik və nəticələrə görə konkret banklar üzrə orientir müəyyən olundu. Milli Bankın idarə heyəti tərəfindən banklara onların kapitallaşdırma proqramının hazırlanması tapşırığı verildi", - deyə R. Aslanlı qeyd edib.
Proqramların AMB-yə təqdim olunması bir ay müddətinə müəyyən olunub. Baş direktorun sözlərinə görə, proqramda 2007-ci ilin yanvarın 1-nə və 2007-ci ilin iyulun 1-dək olan vəziyyətə görə kapital artımının qrafiki öz əksini tapmalıdır. Bankların bu dəfəki qiymətləndirilməsi 2006-cı ilin iyulun 1-nə ümumi kapitalın 6,4 mln. manata çatdırılması üzrə AMB-nın normativ tələblərinin yerinə yetirilməsi əsasında həyata keçirilib. AMB-nin idarə heyəti tərəfindən təsdiqlənmiş qrafikə əsasən, 2007-ci il yanvarın 1-nə müəyyən olunmuş növbəti normativ tələb 8,200 mln. manat təşkil edir. 2007-ci il iyulun 1-dək isə bankların ümumi kapitalı 10 mln. manatdan az olmamalıdır.
İdarə heyətində lizenziyaların geri alınması ilə bağlı qərarlar qəbul olunmayıb. AMB gələcəkdə atılacan addımları bankların kapitallaşdırma proqramlarından irəli gələrək müəyyənləşdirmək niyyətindədir, - deyə R. Aslanlı vurğulayıb.